Një ngjarje e rëndë ka ndodhur ditën e sotme në spitalin Infektiv, ku një tjetër pacient u hodh nga kati i 3 i spitalit.
Së fundmi, shefja e Spitalit Infektiv Najada Çomo në një lidhje me skype për “ABC Radar” foli për situatën shëndetësore të pacientit, duke treguar se gjendja shëndetësore e tij, paraqitet kritike jo vetëm për shkak të Covid-19, por tashmë edhe për shkak të pasojave pas ngjarjes së sotme.
“Sigurisht është ngjarje tragjike ajo që ka ndodhur me një pacient të shtruar në 24 orët e fundit. Ai ndodhet aktualisht në terapi intensive pranë spitalit Infektiv. Akti është kryer nga në një situatë të rënduar psikologjike. 69-vjeçari është në situatë problematike qoftë nga sëmundja bazë por edhe nga pasojat që u shkaktuan nga vetëhedhja. Puna jonë ka edhe këto lloj problematikash, por që gjithsesi puna jonë do të vazhdojë ndërkohë që do të kërkoja edhe nga mediat të na mbështesin në punën tonë, të kemi suportin moral që nevojitet si në rastin e pacientëve dhe në rastin e personelit mjekësor”, deklaroi Çomo.
Më tej, Çomo shtoi se çdo pacient i infektuar nga Covid-19, është i rrezikuar të preket nga çrregullimet psikologjike, dhe kjo situatë rëndohet edhe nga fakti se kur hyn në spital, i sëmuri, përballet me frikën por edhe me mungesën e kontaktit fizik me familjarët gjatë kohës së shtrimit.
“Për të qenë korrekt me ju, gjithmonë mbetet frika për pasojat që sëmundja lë në sistemin nervor. Padiskutim mund të themi që çdo pacient që është i prekur nga Covid është i rrezikuar nga çrregullimet psikologjike. Pranë infektivit kemi psikologë të atashuar, në krahun tim çdo ditë është në krahun tim psikologu, është pjesë e punës në spitalin Infektiv. Pacientët kur hyjnë në Infektiv, kanë frikën e sëmundjes, kanë problematika të tjera siç mund të jetë kontakti i pamundur me familjarët, gjë e cila rëndon psikologjikisht pacientin, edhe pse ne mbajmë kontakte të vazhdueshme me familjarët e çdo pacienti”, sqaroi doktoresha.
Çomo sqaroi edhe situatën e përpara disa ditëve, kur media raportoi për disa ambulanca me pacientë, që prisnin në radhë pranë spitalit Infektiv, duke u shprehur se shkak për këtë ishte situata në Infektiv, pasi ajo është dinamike, ka pacientë që shërohen dhe dalin nga spitali, ndërkohë që vendin e tyre e zë një pacient tjetër.
“Ne jemi në situatë që është shtuar numri i të infektuarve dhe numri i shtrimeve, gjë e cila ecën në dinamikë sepse disa pacientë dalin dhe disa shtrohen. Në një moment të caktuar ambulanca mund të pres, por ambulanca nuk është vetëm një mjet transporti, ajo është e pajisur në mënyrë të tillë, që ti japë pacientit ndihmën e nevojshme. Ka njerëz që nuk kanë sëmundje kronike por fataliteti ndodh kur ky virus prek pjesën më të madhe të pulmonit, por edhe për shkaqe të komplikacioneve të tjera.”
