Besimtarët ortodoksë dhe katolikë festuan lindjen e Krishtit! Besimtarët katolikë, të mbledhur në Katedralen e “Shën Palit” në Tiranë, u lutën para mesnate për më shumë paqe e mirësi në meshën tradicionale të Krishtlindjes, që u kremtua nga Arkipeshkvi i Arkidioqezës Tiranë-Durrës, imzot Xhorxh Frendo.
“Të lutemi për këta njerëz që parapëlqejne të jetojnë në errësirë”, tha imzot Frendo duke iu referuar terroristëve. Bashkë me urimin për të gjithë besimtarët, kjo dioqezë ka lajmëruar se nuk do të organizojë pritjen tradicionale me politikanë.
“Krishtlindja është sigurisht festa e të gjithëve, por veçanërisht e të varfërve dhe të atyre që janë në kufijtë e shoqërisë tonë. Është ky motivi, pse Arkidioqeza e Tiranë-Durrësit ka vendosur që, në Krishtlindjen e këtij viti, në vend të pritjes zyrtare për pushtetarët, politikanët, ambasadorët e të tjerë, të organizojë një drekë për të varfrit në ambientet e Arkipeshkëvisë Tiranë-Durrës”, thuhet në njoftimin e imzot Frendos.
Ditën e sotme, që në orët e para të mëngjesit, qindra besimtarë ortodoksë u mblodhën në Katedralen “Ngjallja e Krishtit” në Tiranë, në meshën e drejtuar nga Fortlumturia e tij, Anastasi.
“Krishti, perëndia ynë i vërtetë që lindi në shpellë dhe u shtri në grazhd, le të na çlirojë nga çdo formë e dukshme apo e fshehtë e arrogancës dhe nga çdo lloj robërie ndaj egocentrizmit dhe varianteve të tij të shumëllojta dhe le të na bëjë të jetojmë me përulësi e thjeshtësi shpirti, duke ndjekur gjurmët e tij”, tha Anastasi.
Krishtlindja simbolizon, ardhjen në jetë, të birit të Zotit që u sakrifikua për njerëzit.
Stafi i “Icon” u uron të gjithë besimtarëve, Gëzuar Krishtlindjen!
