“Bota po pret me padurim vaksinën anti-Covid sikur Prometehu t’i sillte zjarrin njerëzve”.
Kështu shkruan gjermanja “FAZ” teksa publikon një intervistë të Ugur Sahin, shefit të kompanisë mjekësore “Biontech”, e cila dy ditë më parë ka zyrtarizuar prodhimin e vaksinës për përdorim.
Në mbarë botën është rikthyer shpresa se pandemia e koronavirusit do të marrë fund shpejt. Të martën, kompania gjermane “Biontech” shpalli se ka prodhuar një vaksinë efektive kundër koronavirusit.
Ugur Sahin, shefi i kësaj kompanie, ka sqaruar se si do të shpërndahet vaksina në kushtet kur kërkesa është kaq e madhe.
“Për ne është e rëndësishme që të gjejmë një proces të ndershëm për shpërndarjen e vaksinës. Pandemia është e pranishme kudo”,- tha ai për gazetën gjermane, “FAZ”.
“Ne kemi kontrata me SHBA, Anglinë, BE-në dhe vende të tjera. Do përpiqemi që të ndajmë dozat në rajone të ndryshme. Gjithçka do relaksohet në vitin 2021, kur do të shtohen kapacitetet prodhuese”.
Sahin thotë se, vaksina do të nisë të shpërndahet shpejt. Për këtë vit, kompania shpreson të prodhojë dhe shpërndajë 50 milionë doza.
“Misioni ynë është që të përshpejtojmë prodhimin, në mënyrë që të shpërndajmë 1.3 miliardë doza vitin që vjen”,- tha ai, duke shtuar se kompania sapo ka blerë një fabrikë prodhimi vaksinash.
Por sa e shtrenjtë do jetë vaksina? Sahin jep shpresa për vendet e varfra. Ai tha se, çmimi do të variojë në varësi të fuqisë ekonomike në rajone të ndryshme.
“Pra do jetë çmim me kategori të ndryshme. Edhe sasia e porositur do të ndikojë në çmim. Për vendet e industrializuara, çmimi prej më pak se 20 dollarë për dozë do të jetë objektiv”,- tha ai.
Kjo do të bëjë që vaksina të jetë e përballueshme nga shtresat e mesme të popullatës në shumë shtete, por nuk përjashtohet as mundësia që qeveri të ndryshme ta stimulojnë gratis bërjen e vaksinës për shtresat e varfra.
/Burimi: FAZ/Përshtati: Iconstyle.al/
