Sot në emision u trajtua sërish tema e Koronavirusit dhe u theksua rëndësia e testimit.
“A duhet të testohet çdo kush që dyshon se mund të ketë Koronavirus?”, ishte pyetja që gazetari Blendi Fevziu i shtroi mjekut kirurg onkolog shqiptar në Milano, Elson Gjoni.
Ky i fundit nuk mohoi rëndësinë e testimit, por u shpreh se nuk mund të testohesh menjëherë sapo ke pasur kontakt me dikë që është pozitiv. Kjo pasi brenda 24 orëve mund të dalësh negativ ndaj Koronavirusit, dhe pas një jave mund të shfaqesh pozitiv.
Kryesorja është izolimi për të kuptuar më pas nëse ke simptoma të virusit ose jo! Edhe shefja e Epidemiologjisë në ISHP, nënvizoi se duhet mbi pesë ditë që testi të arrijë të identifikojë nëse një person është i infektuar ose jo nga Koronavirusi.
“Duhet të jetë mbi ditën e 5-të që të shafqim pozitivitet në test. Kjo është e rëndësishme kur bëhet testi i PCR që është testi konfirmues i Koronavirusit”, tha Eugena Tomini.
Por si kryhet testimi për Koronavirusin!
Mjeku i spitalit “Shefqet Ndroqi” Arjan Mezini tha në studion e emisionit “Opinion”, se dhe ai vetë kishte kryer testin e Koronavirusit, pasi njëri nga pacientët e shtruar në këtë spital kishte dalë pozitiv.
Mezini tha se testi i tij kishte rezultuar negativ, ndërsa sqaroi se tamponi merret në hundë dhe në grykë.
I pyetur nga gazetari Blendi Fevziu, përse iu nënshtrua testit, Mezini tha:
“Doli rasti pozitiv, besoj bëhet fjalë për pacientin që është në intubim. Ky ka qenë një pacient i shtruar për sëmundje të brendshme dhe papritur gjendja u agravua dhe mendohet që është kontakti me të afërmin e tij”, tha Mezini.
/ Opinion.al
