Qytetarët e kryeqytetit patën mundësinë ditën e djeshme të njiheshin me historinë e Tiranës në formën më të veçantë. Në sheshin “Nënë Tereza” u pasqyruan disa imazhe në hologram shoqëruar me elementë të tjerë si muzikë, pikturë dhe narracion, me rastin e 100-vjetorit të Tiranës si kryeqytet.
Kjo është hera e parë që një teknologji e tillë vjen në Ballkan për të promovuar përmes video-artit trashëgiminë kulturore. I gjithë projekti është realizuar në ambient të hapur nga “Qendra Ti”.
Historia e rrëfyer përmes legjendave urbane
Në hologramet e pasqyruara në sheshin Nënë Tereza shfaqen disa modele që tregojnë etnografinë shqiptare, të përcjella në formën e një përralle të bukur. Për të rrëfyer të gjithë historinë e qytetit janë mbledhur fakte nga legjendat urbane, të cilat janë trashëguar nga njerëzit në një mënyrë shumë origjinale.
Figurat 3D tregojnë historinë e Tiranës në 4 periudha të ndryshme të historisë, duke nisur nga Ilirët e deri tek ajo çfarë e pret kryeqytetin në të ardhmen.
Hologramët në pjesën më të madhe të botës pasqyrohen në vende të mbyllura, pasi pamja është më e qartë. Mirëpo këtë herë Tirana pasqyroi gjithçka si kurrë më parë një hapësirë jashtë dhe pavarësisht vështirësive projekti ishte realizuar në perfeksion. Përveç pamjeve me hologram, kishte shumë elementë të përfshirë për ta bërë sa më të prekshme historinë. Përmes vizatimeve u pasqyruan gjithë ndërtesat e vjetra që kanë humbur me kohën dhe muzika popullore që tashmë është harruar u përshtat me ritmet moderne.
Projektimi me hologram do të vazhdojë të jetë i pranishëm në sheshin “Nënë Tereza” edhe gjatë ditës së sotme e të nesërme dhe pret gjithë qytetarët për t’u njohur me historinë sapo të bjerë muzgu.
