Batuta të tipit “Shushu”, apo “Ekzekutoje” i njeh sot çdo i ri që ka një profil në Instagram apo Facebook. Videot e dubluara në shqip janë ato të preferuarat, veçanërisht kur bëhet fjalë për dublimin e personazheve të njohura të politikës, nga Presidenti e deri të deputetët e Kuvendit.
Mijëra fansa i ndjekin në rrjetet sociale, ndaj edhe “Çmendina Dublim”, përfaqëson sot një nga faqet më argëtuese shqiptare që mund të jetë krijuar ndonjëherë me mbi 340 mijë fansa vetëm në Facebook.
Tashmë, përpos pranisë në Instagram dhe Facebook, djemtë e rinj që themeluan këtë komunitet argëtues, mund t’i gjeni në faqen e tyre zyrtare www.çmendina.tv si dhe në radio.
Duke qenë se është një nga faqet e preferuara të humorit për të rinjtë shqiptarë, Iconstyle.al kontaktoi me njërin prej skenaristëve dhe aktorëve të “Çmendina Dublim”. Marsijon Durmishi i njohur nga të gjithë si Mario, foli për sezonin e ri të “Çmendina Dublim” dhe disa detaje nga prapaskena.
Interesi ynë më i madh ishte të dinim reagimet e personazheve të njohur kur shohin veten të dubluar. Sigurisht që videot e “Çmendinës” kanë pasur impakt edhe tek ata personazhe që e kanë gjetur veten në video.
“Personalisht nuk më kanë kontaktuar, ndërsa te “Çmendina” kanë kontaktuar shumë nga ata që janë dubluar”, rrëfen Mario për Iconstyle.al, ndërsa shton se nuk ka pasur ndonjë rast kur është fshirë ndonjë video apo dubël nga kërkesa e dikujt.
Shpesh herë ka ndodhur edhe që videot e çunave të shpërndahen personalisht nga kreu i Bashkisë së Tiranës, Erion Veliaj dhe për këtë Marsijoni thotë se:
“Kjo tregon që videot janë virale dhe kur pëlqehen dhe nga personat e dubluar, është mirë”.
Në sezonin e ri, “Çmendina Dublim” do të vijë me risi, dhe personazhe të reja, ku përpos Marios, do të kemi edhe një Markos.“Do të ketë shumë personazhe të rinj gjithashtu dhe ata të sezonit të kaluar. Do të kemi Mario, por edhe Markos që është një personazh i ri”, thotë Marsijoni.
Me sa mësuam, Markos është një personazh i frymëzuar nga seriali i preferuar televiziv “Narkos”, që tregon historinë e tregtimit të kokainës në Kolumbi dhe përvoja reale të bosëve të drogës në vitet ’80.
Batuta e vitit 2017 që do të mbahet mend gjatë, është “Shushu” dhe për këtë Mario thotë se “eshte perla e 2017” -s.
“Shushu të gjithëve”, thotë aktori duke qeshur.
Edhe këtë sezon, “Çmendina Dublim” do të vijë me rubrikat interesante si këngët në shqip, M.H.M, Bëmat e Javës etj, ndaj edhe Marsijoni ju fton ta ndiqni çdo të hënë në orën 21:00. Ndonëse duket e çuditshme kur e themi kështu, për Marsijonin, “çdo ditë është e bukur në “Çmendinë” dhe me siguri pas 5 vitesh, ai do ta gjejë veten sërish në “Çmendinë”.
