Ian Holm, aktori i famshëm në rolin e “Bilbo Baggins” në serialin “Lord of the Rings”, është ndarë nga jeta në moshën 88-vjeçare.
Lajmi i hidhur është konfirmuar nga zëdhënësi i aktorit për “The Guardian”.
Holm vuante prej kohësh nga sëmundja e Parkinsonit dhe së fundmi gjendja e tij shëndetësore ishte përkeqësuar.
Aktori ndërroi jetë këtë mëngjes në një spital në Londër, ndërsa në momentet e fundit kishte pranë personat më të dashur.
Fitues i një çmimi “Bafta” dhe i nominuar për një çmim “Oscar”, Holm la pas një karrierë të suksesshme me qindra role për të cilat do të mbahet mend.
Aktori iu fut kinematografisë që në vitin 1976, pasi hoqi dorë nga shfaqjet në teatër.
Ai lindi në Essex në vitin 1931 dhe do të mbahet mend gjatë në kinematografinë botërore.
