Moderatorja e njohur Jonida Shehu që pas largimit të bujshëm nga emisioni i pasdites që drejtonte në “Top Channel” e kemi parë shumë rallë në ekranet tona. Herët e fundit që e kemi parë Jonidën në rolin e prezantueses kanë qenë në “Festivalin e RTSH”-së dhe spektaklin “Miss Shqipëria”.
Pavarësisht kësaj shkëputjeje Jonida e ka thënë gjithmonë se shumë shpejt do të rikthehet në ekranet tona. Vetëm pak kohë më parë në një intervistë për “Jo vetëm modë” Jonida ka zbuluar se me nisjen e sezonit të ri televiziv do të rikthehet në ekran me një projekt të ri.
“Do të rikthehem sezonin e ri, ku nuk e them dot për momentin. Janë edhe tre muaj përpara, çdo gjë mund të ndodhë edhe në minutën e fundit. Unë kam plan të rikthehem, të shpresojmë që çdo gjë të shkojë sipas planit deri në shtator-tetor”, është shprehur Jonida.
Mirëpo së fundmi “Dritare.net” ka zbuluar se Jonida do të rikthehet përsëri në ekranin e “Top Channel”, por nuk do të moderojë emisionin e pasdites. Kësaj radhe ajo do të sjellë një emision të ri surprizë dhe nuk do të jetë vetëm drejtuese, por edhe autore dhe producente.
Nuk na mbetet gjë tjetër veçse të presim shtatorin për të zbuluar detajet e emisionit të saj të ri.
