Vrasësi i 4-vjeçarit shqiptar Almir Aliu, është dënuar nga Gjykata në Kumanovë me 6 vjet heqje lirie.
Ngjarja që i tronditi të gjithë, ndodhi në vitin 2016, kur 4-vjeçari nga Kumanova, Almir Aliu u vra pasi u godit me makinë nga Boban Iliq. Vogëlushi ndodhej së bashku me familjarët e tij në ambulancën e qytetit të Kumanovës dhe pak minuta para se të ndodhte ngjarja tragjike ata kishin pasur një zënkë me të akuzuarin Boban Iliq.
Në shenjë hakmarrjeje Boban është kthyer dhe ka pasur për qëllim të lëndonte të gjithë familjen Aliu, por për fat të keq në këtë moment u lëndua rëndë Almiri 4-vjeçar, i cili për ditë të tëra luftoi me jetën dhe fatkeqësisht nuk mundi të mbijetonte.
Pak ditë më parë, i akuzuari Boban Iliq u lirua nga burgu. Gjykata e Kumanovës e cilësoi aktin e kryer nga ai, jo një vrasje, por një rrezik për jetën në trafik. Boban u prit si një hero nga familjarët, ndërkohë që sot i akuzuar ka marrë dënimin me 6 vite burg.
Burimi: Balkanweb
