I ftohti arktik i kësaj jave duket se ka “frikësuar” edhe Ministrinë e Shëndetësisë. Ndërsa shtyu me një javë nisjen e mësimit në arsimin parauniversitar, tashmë ajo ka lëshuar një tjetër urdhër për mbylljen e tyre deri më 14 janar.
Ndërsa dita për nisjen e mësimit duhet të niste në datën 5 janar, tashmë do të nisë pas 7 ditësh. Kësaj radhe ministria ka urdhëruar edhe mbylljen e universiteteve.
Në njoftimin e ministrisë thuhet: “Me qëllim kufizimin e mëtejshëm të përhapjes së virusit të gripit në vend për të mbrojtur popullatën nga sëmundjet infektive që kanë impakt në shëndetin e saj, Ministri i Shëndetësisë, në mbështetje të nenit 102, pika 4, të Kushtetutës së Republikës së Shqipërisë, si dhe të nenit 7, pika 4 (masa të veçanta) të Ligjit 15/2016, “Për parandalimin dhe luftimin e infeksioneve dhe sëmundjeve infektive”, ka urdhëruar sot më datë 07.01.2017, mbylljen e çerdheve, kopshteve dhe institucioneve të arsimit parauniversitar dhe universitar në datat 9, 10, 11, 12, 13 dhe 14 janar 2017”.
