Rita Ora po përflitet ditët e fundit për një romancë të mundshme me regjisorin e famshëm të filmave, Taika Waititi. Fillimisht ishte Rita ajo që nxiti thashethemet për lidhje, pasi publikoi në rrjete sociale një foto me regjisorin. Të dy ata dukeshin shumë të afërt me njëri-tjetrin, teksa Taika i kishte hedhur duart në qafë Ritës. Madje të dy ishin veshur gati njësoj me rroba nga marka e famshme “Gucci”.
Ndërkohë sipas informacioneve nga mediat e huaja ata janë në lidhje prej më shumë se një muaji, ndërsa këngëtarja ka qenë në Sydney për spektaklin “The Voice”. Megjithatë dyshja nuk kanë bërë asnjë lloj reagimi në lidhje me këto lajme dhe pyetja që po i mundon fansat është: a janë apo jo bashkë Rita dhe Taika?
Kësaj pyetje nuk mund t’i përgjigjet askush me siguri të plotë, por shenjat na çojnë drejt përfundimit se mes tyre ka lindur diçka. Ditën e premte dyshja i kanë hedhur benzinë zjarrit, pasi janë shfaqur bashkë në premierën botërore të “Drag Race Down Under” në Sydney.
Sipas disa burimeve, Taika do të ketë rolin e jurisë në kompeticion dhe në tapetin e kuq të premirës ai u shfaq përkrah Rita Orës. Të dy dukeshin të mrekullueshëm, teksa Rita ra në sy të të gjithëve e veshur me një veshje komplet të bardhë dhe një xhaketë me printe leopardi.
Kujtojmë se Rita ka qenë së fundmi e ftuar në “The Kyle and Jackie O Show”, ku u vendos në siklet për jetën e saj private. Drejtuesit e programit e ngacmuan moderatoren për lidhjet e saj të dashurisë dhe në fakt Rita arriti t’i shmangej pyetjes me lezet.
“Mendoj se tashmë jam fokusuar tek të qenurit fit për të qenë e sinqertë”, u përgjigj këngëtarja pas një pauze të gjatë.
“Kjo është fantastike, mund të lexoj mes rreshtave”, ju përgjigj një nga moderatorët me shaka Ritës.
