Që nga 16 Janari tashmë tarifat e shërbimeve për patentat janë dyfishuar e trefishuar. Në shkresën e miratuar nga Ministria e Infrastrukturës dhe të firmosur nga Drejtoria e Përgjithshme të Transportit Rrugor kanë hyrë në fuqi tarifat e reja për shërbimet e lejedrejtimeve.
Kur më parë për të dhënë provimin e njohurive teorike kur nuk e fiton testin teorik që në provimin e parë duhej të paguaje 400 lekë si tarifë tashmë duhet të paguash 1200. Po ashtu edhe për riprovimin e testit të praktikës kur më parë do paguaje 500 lekë tashmë do të paguash 4-fish më shumë.
Tonin Gjinaj, Sekretar i Përgjithshëm i Federatës së Transportit, ka reaguar ashpër pas lajmit se tarifat shërbimeve për lejet e drejtimit do të rritet. Ai tha në një intervistë për News24:
Dje u vura në dijeni, por jo zyrtarisht, këto janë tarifa që janë vendosur tinëz dhe në mënyrë të padrejtë, pa marrë mendimin e grupeve të interesit. Nuk mund të katërfishohen çmimet e tarifave. Unë kam dijeni se hyjnë në fuqi në datën 4 shkurt. E papranueshme që në të mos jemi në dijeni. Kjo do të sjellë shumë konfuzion pas datën 4 shkurt. Është akrobaci dhe e paimagjinueshme. Ne nuk do rrimë duarkryq. Jemi mbledhur mbrëmë dhe po mbledhim firma dhe do protestojmë. Shqiptarët nuk do të jenë gati për të tilla gjëra. Nuk shkon dot nga njëshi te katra menjëherë. Së pari ne duhej të ishim informuar. Autoshkollat tani janë në prag falimenti, janë të dorëzuara.
Sikur të mos mjaftonin ato që përmendëm më sipër, pajisja me leje drejtimi për të gjitha kategoritë ka pësuar rritje çmimi nga 3500 lekë në 4500 lekë. Dyfishim tarife ka edhe për shërbime të tjera, siç është pajisja me “Leje”dhe provim kualifikimi teorik pas humbjes totale të pikëve ose heqjes së lejedrejtimit, por edhe për autoshkollat për detyrimet që kanë për ushtrimin e aktivitetit. Shteti shqiptar na kishte paralajmëruar paraprakisht që në shkurt të vitit 2023 për këtë ‘sebep’. E mesa duket me 16 janar të këtij viti e ktheu zhvatjen në realitet.
