Në Holandë jetojnë 1084 shqiptarë të ligjshëm, e megjithatë çuditërisht, sajtet shqiptare klikohen në Holandë nga 35 mijë njerëz.
Sigurisht që kjo nuk do të thotë se holandezët kanë filluar të mësojnë shqip.
“Top Story” vë në fokus një hetim të cilin policia dhe prokuroria holandeze e kanë nisur dy vite më parë. Për të kuptuar sa shqiptarë jetojnë në Holandë, ata kanë studiuar të dhënat e klikimeve që kanë ardhur tek sajtet shqiptare nga Holanda, duke nxjerrë një shifër prej 35 mijë shqiptarësh të cilët kanë lexuar lajme në 50 sajtet më të klikuara shqiptare.
Nga ky lloj hetimi, ka dalë se vetëm në Amsterdam jeton 7-fishi i numrit të deklaruar të shqiptarëve: 7500.
“Kjo ishte një mënyrë për t’i zbuluar. Dhe ishin 35 mijë shqiptarë që po shikonin faqet. Në Amsterdam ishin 7500. Është vetëm një nga mënyrat për të kuptuar se sa shqiptarë kemi”, u shpreh gazetari holandez Paul Vugt.
Kujtojmë se në prill, 5 parti të Holandës kërkuan të rikthehej barriera e vizave për shqiptarët që duan të shkojnë atje, me argument shtimin e kriminalitetit. Megjithatë, çështja i mbetet në dorë Brukselit pra, Bashkimit Europian.
Por, sipas kreut të misionit të BE në Tiranë, Luigi Soreca, deri tani asgjë nuk ka ndryshuar për shkak se Shqipëria është vlerësuar se i plotëson kushtet për lëvizjen e lirë në zonën Shengen.
