Eleni Fouriera, shqiptarja e tretë që do të konkurrojë në Eurovizion 2018 duke përfaqësuar Qipron, ka folur për herë të parë për dy bashkëpatriotët, Ermalin dhe Eugentin.
“Fakti që tre shqiptarë do të ngjiten në skenën e Eurosong-ut më bën të ndihem shumë mirë. Shpresoj që të shkojmë mirë me njëri-tjetrin. Nuk ndiej konkurrencë ndaj tyre, të dyja këngët më pëlqejnë. Videoja e këngës që do të përfaqësojë Italinë më pëlqen se është kuptimplotë, është për ngritjen kundër racizmit, për lirinë në botë. Por edhe kënga përfaqësuese e Shqipërisë më pëlqen dhe Eugenti është një këngëtar i shkëlqyer”, ka thënë këngëtarja lidhur me faktin se do të jenë 3 shqiptarë në garë.
Ajo sqaron se s’ka patur ndonjë arsye që ka qëndruar jashtë muzikës shqiptare, por ka ndikuar fakti se në Greqi ka shkuar shumë e vogël.
“Sa herë vizitoj Shqipërinë unë ndihem e lumtur. Erdha në Tiranë vitin e kaluar dhe m’u duk fantastike. S’jam larguar, përkundrazi kam shumë dëshirë të bashkëpunoj me artistë shqiptarë. E dashuroj muzikën që bëni ju”, ka shtuar këngëtarja.
