Nuk është rasti i vetëm, por përfaqëson të tjerë pasi historia e këtij shqiptari, u publikua te prestigjiozja “The Sun”. 35-vjeçarit Alban Saiti, punëtor ndërtimi në Londër, iu kërkua të largohej nga kafeneja “Raoul’s” sepse kishte rroba të pista.
“Zotëri, nuk mund t’iu shërbejmë!”- i ka thënë kamarieri Saitit. Albani e ka treguar këtë ngjarje për “The Sun” duke treguar edhe përgjigjen.
“Unë nuk punoj në zyrë, punoj në ndërtim. Çfarë duhet të bëj për të marrë një kafe, të zhvishem?”, ka thënë Albani.
Albani ka 20 vite që jeton në Londër dhe nuk i ka ndodhur asnjëherë më parë një ngjarje e tillë, “nuk jam ndjerë kurrë kaq i turpëruar”.
Në fakt, rrobat e tij nuk ishin fare të pista, siç duket edhe në fotografi, por kishin shenjat e punës që ai bën.
Pronarja e lokalit për të mbrojtur reagimin e menaxherit tha: “Ai nuk ishte i pistë, por ai ishte me rrobat e punës me njolla në pantallona. Këtë e kemi bërë edhe me të tjerët që janë shfaqur me ato veshje”.
Burimi: The Sun
