Një 30-vjeçar shqiptar humbi jetën në Londër, gjatë kohës që po shkonte për në punë.
Rreth orës 6 të mëngjesit Ardian Zagani po ecte me biçikletën e tij, kur një furgon e përplasi për vdekje. Pasagjeri i furgonit ka tentuar t’i japë atij ndihmën e parë, por Zagani nuk ia ka dalë të mbijetojë.
Sipas mediave britanike, 30-vjeçari shqiptar, i cili po shkonte në ditën e parë të punës, është çiklisti i gjashtë që aksidentohet për vdekje së fundmi në Londër, gjë që ka nxitur qytetarët të mblidhen për një protestë.
Ngjarja ndodhi në Camden në kryeqytetin britanik dhe në të njëjtin vend, qytetarë të shumtë janë shtrirë në tokë së bashku me biçikletat e tyre, duke protestuar me sloganin ‘Mos i vrisni çiklistët’.
