Shqiptarët tërheqin më pak para nga bankomatet dhe kryejnë më pak transaksione bankare me kartat e debitit dhe kreditit. Gjatë muajit nëntor të vitit të kaluar, janë regjistruar më pak tërheqje se muaji tetor nëpër pikat ATM. Të dhënat që publikohen nga Banka e Shqipërisë në raportin statistikor mujor tregojnë shkallën e ndikimit të situatës së pandemisë. Tani njerëzit e kaluan fazën e parë të panikut nga pandemia, por edhe kufizimet anti-covid të lëvizjeve janë më të vogla.
Sa para tërheqim me kartë mesatarisht?
Sipas BSH, janë tërhequr nga bankomatet rreth 18.08 mld lekë cash, ose rreth 146 mln euro, nga rreth 18.86 mld lekë që ishin në muajin tetor. Rënia fiksohet në rreth 780 milionë lekë më pak, ose rreth 6.3 milionë euro. E shprehur në përqindje, kjo rënie është 4.13%.
Megjithatë , gjatë nëntorit, vlera mesatare e tërhequr në një transaksion nëpër pikat ATM në vendin tonë ka qenë prej 13 mijë e 200 lekësh, nga rreth 12 mijë e 970 lekë që ishte gjatë muajit paraardhës. Në muajin shtator kjo vlerë ishte 13 030 lekë ndërsa në gusht ishte 13 410 lekë dhe në korrik 13 460 lekë. Në qershor kjo vlerë ishte 12 820 lekë, ndërsa në prill arriti në 14 210 lekë.
Këto janë shifrat më e ulta që prej korrikut të vitit të kaluar, që shënoi kulmin e tërheqjes së parave. Kjo periudhë koincidon me tërheqjen e pagave të luftës të paketës së dytë ndihmëse të qeverisë.
Rritet numri i kartave
Të dhënat e tremujorit të tretë të vitit ndërkohë, tregojnë se në qarkullim ka pasur rreth 1.27 milionë karta në qarkullim. Kjo tregon rritje të numrit të kartave bankare.
Sipas të dhënave të Bankës së Shqipërisë qershor 2020, në Shqipëri ishin gjithsej 1,188,249 karta të lëshuara, nga të cilat 1,075,500 janë karta debiti dhe 112,749 janë karta krediti.
Rritja e transaksioneve
Është fakt që krahasuar me vitet e shkuara numri i transaksioneve me kartë është rritur në mënyrë të dukshme. Kështu, numri transaksioneve për vitin 2019 është rreth 5 milionë, kurse në vitin 2016 ishin vetëm 2.35 milionë. Dhe ajo që bie më shumë në sy është se veprime për tërheqjen e cash-it në ATM në vitin 2016 ishin 14.3 milionë, kurse në vitin 2019 – 16.5 milionë. Pra, 3 herë më shumë veprime për tërheqje në ATM se sa veprime në POS!
Veprimet online
Një prirje tjetër pozitive është kryerja e transaksioneve online. Nga 1.8 milionë veprime në vitin 2016 në mbi 3.6 milionë në vitin 2019.
Krahasimi me rajonin
Për 1,000 persona në moshë të lejuar (adults) Shqipëria ka 483 karta të emetuara, ndërkohë që rajoni luhatet nga 2,449 për Kroacinë në 759 për Bosnjë Hercegovinën (të dhëna këto sipas FMN për vitin 2019).
Edhe pse gjatë periudhës 2016-2019, në nivel vendi, rezulton një rritje vjetore konstante në numrin e transaksioneve të realizuara me karta në POS, mesatarisht 28%, dhe për volumet e gjeneruara-21%, sërish, numri i transaksioneve për një kartë në POS, në Shqipëri, është 4 (Kosova) deri 10 (Maqedonia e Veriut) herë më i ulët se në vendet e rajonit.
Të dhënat e BSH
Në të dhënat e raportuara nga Banka e Shqipërisë për tërheqjet nëpër pikat ATM nuk klasifikohen vetëm kartat e lëshuara nga bankat që operojnë në vendin tonë, por edhe nga të huajt apo emigrantët të cilët tërheqin cash me karta nga bankat e huaja.
