Pavarësisht mundësive të kufizuara për të udhëtuar jashtë për shkak të pandemisë, sërish, virusi nuk i ka ndaluar shqiptarët të prenotojnë pushimet jashtë Shqipërisë.
Monitor.al shkruan sot se hapja e shumëpritur e kufijve ka sjellë përgatitjen e valixheve drejt Turqisë apo Egjiptit. Qarkullimi sigurisht që nuk është shumë i lartë në krahasim me vitet e kaluara, por fluturimet janë të përjavshme drejt destinacioneve që presin shqiptarë.
Arsyeja e largimit sipas Monitor.al janë ofertat në destinacionet turistike turke që kanë qenë të kënaqshme dhe me një ulje të lehtë çmimesh krahasuar me një vit më parë, në një kohë që restortet në jug nuk kanë bërë asgjë në këtë drejtim.
Ndonëse u fol shumë për patriotizmin ekonomik dhe rëndësinë që ka bërja e pushimeve në Shqipëri, për të për të shmangur krizën ku ndodhet vendi, largimi jashtë për të shpenzuar buxhetin në vendet e tjera, po duket si një dështim i Jugut! Por a mund ta kishte shfrytëzuar këtë moment Jugut për t’i mbajtur pushuesit brenda vendit dhe më kryesorja, a duhet t’ia lëmë tërësisht fajin Jugut të Shqipërisë?
Së pari, roli i qeverisë ishte primar në stimulimin e shqiptarëve, dhe jo vetëm atyre që largohen jashtë Shqipërie, por edhe atyre që nuk bënë fare pushime këtë verë për shkak të situatës së vështirë ekonomike.
Kreu i Shoqatës së Turoperatorëve dhe Agjencive Turistike, z. Rexhep Kasmi tha sot për “iconstyle.al”, se shteti nuk i stimuloi shqiptarët që të pushonin në vendin e tyre ashtu siç bënë shumë shtete fqinje (lexo këtu), pavarësisht propozimit të turoperatorëve.
“Ndonjë stimulim nga shteti nuk u bë. Ne e kemi propozuar atë bonusin sidomos për familjet me të ardhura të caktuara. Mund të caktohej që t’u jepej mundësi në këto kushte, duke qenë të prekur nga pandemia, tu jepej mundësia të bënin të paktën një javë pushime. Prandaj janë këto stimulimet. Por këtu nuk u pa e arsyeshme. Normalisht ishte një stimul, por u la më tepër në dorë të spontanitet ‘të vijë kush të vijë’. Ishte një mundësi për t’u siguruar për turistët”, u shpreh ai.
Po si mund të funksiononte një skemë e tillë?
Kasmi u shpreh se nëse një familje shqiptare do të bënte një qëndrim një javë, për 500 euro në një hotel, 30% mund ta merrte shteti përsipër për ta mbuluar dhe 70% familja. Forma që të mos vinte leku në dorë të personit dhe ai të bënte çfarë të donte, ka plot, si për shembull t’i paguheshin pushimet drejtpërdrejt hotelit.
E vetmja ide për të ringritur turizmin, që nuk na çoi gjëkundi, ishte ajo e ministrit Blendi Klosi për zgjatjen e sezonit turistik deri më 15 nëntor apo ajo e dhënë nga ish-ministri i Shëndetësisë, Ilir Beqja, i cili kërkoi më shumë pushime për administratën gjatë javës, dhe propozoi që në muajt e verës, e premtja dhe e hëna të jenë pushim.
Më thuaj nivelin e klientelës, të të them çimim!
Nga ana tjetër, ka pasur mjaft ankesa për çmimet e shtrenjta në jug, dhe faktin që shërbimi në vendin tonë nuk është cilësor dhe nuk i justifikon aspak tarifat e shtrenjta.
Kreu i Shoqatës së Turoperatorëve, Z. Kasmi u shpreh se sot që flasim, nuk janë krijuar kushtet për të pushuar cilësisht në Shqipëri, qoftë edhe për ata shqiptarë që ikin jashtë për të pushuar.
Problemi më i madh sipas tij me çmimet e larta, është se kemi të bëjmë me një treg që është i papërgatitur dhe i pastërvitur për këtë lloj situate pas pandemisë.
Tregu i hotelerisë e i shërbimeve nuk është në dorë të specialistëve në pjesën më të madhe të vendit. Kjo do të thotë se ky sektor u llastua në vitet e kaluara nga pushuesit e huaj me një potencial të madh pagese dhe sot që klientët e tyre janë pushues vendas dhe nuk e kanë luksin të paguajnë sa një i huaj, janë penalizuar.
“Hotelet nuk janë në dorë të specialistëve, dhe reagimi që presim nuk mund të jetë i një specialisti. Përshtatja e nivelit të çmimit me nivelin e klientelës duhet të kishte ndodhur patjetër, pasi një klient shqiptar nuk mund të paguante atë nivel çmimi që mund të paguante deri vjet suedezi. Kjo përshtatje nuk u bë sepse nuk mund ta bëjë shteti, kjo është marrëdhënie private, kërkesë ofertë. Kërkesa ishte e ulët, oferta ishte e shtrenjtë si të ishte kërkesa e lartë. Nuk ka mekanzima, nuk ka ligje dhe shteti nuk mund të ndërhyjë, dhe bizneset nuk realizojnë të ardhura maksimale sepse e mbajnë vetë larg potencialin që është aktualisht në treg. Kjo është një sjellje e gabuar për një moment kritik siç ishte ky”.
Përpjekjet për të ringritur turizmin në vend këtë vit, lanë shumë për të dëshiruar, në një kohë shqiptarët dhe sektori i turizmit kishte nevojë më tepër për masa lehtësuese dhe bonuse për pushime, sesa ditë pushimi.
/Iconstyle.al
