Shqipëria është një shtet me popullsi të vogël, por sipas disa të dhënave nga Eurostat renditet e dyta në Europë, përsa i përket fitimit të shtetësisë në një nga vendet e Bashkimit Europian.
Të dhënat e Eurostat bëjnë të ditur se 58 mijë e 853 shtetas morën shtetësi në një nga vendet e BE-së në vitin 2017-n, duke u renditur ndër tre vendet e para në Europë që kanë marrë shtetësi në një nga vendet e BE-së.
Emigrantët që kanë vite që janë larguar nga Shqipëria, po bëhen qytetarë me të drejta të plota kryesisht në Greqi dhe Itali.
Në vend të parë renditet Maroku, me rreth 68 mijë pasaporta dhe në vend të tretë, India me 32 mijë pasaporta.
Italia ka dhënë 27 mijë e 112 pasaporta për shqiptarët. Pas tyre janë marokenët (22.6 mijë) dhe brazilianët (rreth 10 mijë).
Greqia ka dhënë gati 30 mijë pasaporta për emigrantët shqiptarë. Ata që jetojnë në Greqi kanë rezultuar tepër të preferuar sa i përket vendimmarrjes së institucioneve për t’i dhënë shtetësinë.
Përveç Greqisë dhe Italisë, shqiptarët po arrijnë të marrin pasaporta dhe në shtete të tjera, por me shifra shumë më të ulëta. Belgjika ka dhënë 571 pasaporta, Gjermania ka dhënë 374 pasaporta, Mbretëria e Bashkuar 315, Franca 282./gazetareforma
