Ndërkohë që ne jemi në pritje të planit ekonomik nga kryeministri Edi Rama për lehtësimin e pasojave kritike të Koronavirusit, të mërkurën, më 18 Mars Presidenti Rexhep Tajip Erdogan, njoftoi një paketë prej 15 miliardë dollarësh për të ndihmuar ekonominë turke të përballet me krizën e COVID-19 dhe u bëri thirrje turqve të dalin nga shtëpitë e tyre sa më pak të jetë e mundur.
“Me një paketë që ne e quajmë “Mburoja e Stabilitetit Ekonomik “, ne po vendosim 100 miliardë lira turke (15 miliardë dollarë) në mënyrë që të zvogëlojmë efektet e pandemisë COVID-19”, tha Erdogan pasi kryesoi një takim në Ankara për të diskutuar mënyrat për të zgjidhur krizën.
Ai njoftoi një seri masash duke përfshirë uljen e taksave për bizneset dhe ndihmën për familjet me të ardhura të ulëta, përfshirë ato me paga minimale dhe pensionistët.
“Pensioni më i ulët do të rritet në 1.500 lira turke (rreth 230 dollarë)”, tha Erdogan.
Një masë tjetër ishte ulja e taksës së vlerës së shtuar në fluturimet e brendshme me 18% për një periudhë tre mujore, tha presidenti.
Erdogan gjithashtu bëri me dije se qeveria e tij do të mbështesë linjën Turkish Airlines, për të cilën tha se është një nga kompanitë kryesore të prekura rëndë nga kriza pas anulimeve të fluturimeve.
Ai shtoi se tani është “koha për të mbajtur kontaktin me botën e jashtme në minimum”.
Ndërkohë, qeveria jonë pritet të zbulojë sot planin ekonomik të shumëpritur, pasi ashtu siç premtoi Rama në fund të muajit askush nuk do të mbetet pa pagesë dhe të gjithë do të kenë mbështetjen e qeverisë.
“NUK DO TË VIJË FUNDI I MUAJIT PA PAGËN E GJITHKUJT NDËR JU QË QËNDRON NË SHTËPI SI PASOJË E MBYLLJES SË BIZNESIT KU PUNON!”, u shpreh Rama.
Gjithashtu, ka hyrë në fuqi vendimi për shtyrjen e afatit të pagimit të kredive. Pak ditë më parë, Rama publikoi vendimin ku shkruhet se kredimarrësit duhet të paraqesin arsyen te kredidhënësi, ndërsa afati për pagimin e kredive do të nisë nga 1 qershori.
Por, zbardhja e vendimit ka zbuluar një kleçkë sipas gazetarit Ylli Pata për Gazetën Tema, pasi në shkresën e firmosur nga Guvernatori i Bankës së Shqipërisë, thuhet se shtyrja e kredive me tre muaj i lihet në mënyrë fakultative bankave të nivelit të dytë dhe do jenë ato që do vendosin nëse subjekti ka patur vështirësi apo jo (lexo këtu).
https://www.instagram.com/p/B95ekc3DNA2/?igshid=wmurhhgshjqe
/Iconstyle.al
