Situata me epideminë e koronavirusit në vendin tonë sa vjen e bëhet më kritike, pasi vetëm në 24 orët e fundit, janë regjistraur dy viktima të tjera ndërkohë që një i tretë është në vdekje klinike. Në këtë fazë tejet alarmante ku ka filluar të rritet numri i viktimave, shtohet dhe paniku për atë që flasim prej kohësh: Në Shqipëri nuk ka mjaftueshëm ventilatorë, pajisje të domosdoshme për personat që shfaqin komplikacione të rënda!
Por teksa Ministria e Shëndetësisë vijon të mbajë të fshehtë numrin e vërtetë të këtyre pajisjeve, ndërkohë që përflitet se në total në Shqipëri janë 140 të tilla, shifër tërësisjht e pamjaftueshme, dy shqiptarë kanë ndërmarrë një nismë fantastike që mund të ndryshojë çdo gjë. Në një postim në Facebook, stomatologu i njohur Gjergji Dilo ka njoftuar se dy miqtë e tij, laborantët dentarë Besar Lalike dhe Eldan Cepeli kanë marrë përsipër që me shpenzimet e tyre, të realizojnë pjesë për ventilatorët që realizojnë frymëmarrjen për pacientët në gjendje të rëndë.
“Besar Lalike dhe Eldian Cepeli kanë marrë përsipër me shpenzimet e tyre, të prodhojnë në laborator pjesë të aparateve të ventilimit. Këto pjesë do mundësojnë që me një aparat të vetëm, të lidhet dhe të mbahet në jetë jo 1, por deri në 4 pacientë. Kjo gjë do na mundësonte shpresat për të mbajtur në jetë 4-fishin e pacientëve që janë në stad të rëndë dhe kanë nevojë për ventilim.”-shkruan Dilo.
Burime për “iconstyle.al” bëjnë të ditur se dy laborantët që operojnë përkatësisht në Vlorë e Kavajë, synojnë që me anë të aparateve të printimit 3D, të prodhojnë pjesët e nevojshme për ventilatorët, çka mund të rezultojë në një ndihmë të jashtëzakonshme në rastet e shtimit të shpejtë të rasteve të prekura me COVID-19 që shfaqin komplikacione. Një nismë e tillë është ndërmarrë dhe në qytezën Chiari të Lombardisë, ku një kompani printimi 3D i ka ardhur në ndihmë spitalit duke prodhuar valvula të nevojshme për ventilatorët që kanë rezultuar mëse efektive.
Ndërsa në Bologna, tre ditë më parë është testuar për herë të parë me sukses një ventilator që nëpërmjet një cirkuiti të ndërtuar nga kompania “Intersurgical”, mund të furnizojë me oksigjen dy pacientë njëherësh. Një studim amerikan gjithashtu mbështet mundësinë e përdorimit të një ventilatori për katër pacientë njëherësh, por ndonëse është e rrezikshme, shkencëtarët pohojnë se në raste “jetë a vdekje” përdorimi i kësaj metode mund të bëjë diferencë të madhe.
Burime pranë “iconstyle.al” konfirmojnë se dy laborantët shqiptarë kanë marrë udhëzime nga Bologna për ndërtimin e prototipit dhe në momentin e përfundimit, do t’i dërgohet QSUT për të bërë testet e nevojshme. Nisma e dy laborantëve është përkrahur dhe nga rektori i Universitetit të Mjeksësisë, njëkohësisht kreu i Task-Forcës për COVID-19, prof. dr. Arben Gjata, i cili i ka dhënë dritën jeshile iniciativës së tyre me shpresën dhe besimin se rezultati mund të jetë pozitiv. Ndërtimi i këtyre pjesëve sigurisht është tejet i komplikuar dhe kërkon profesionalizëm të lartë, ndaj tentativa e tyre mbetet në kuadrin e një ekperimenti. Por nëse ky eksperiment rezulton i suksesshëm, mund të jetë vendimtar për jetët e të prekurve.
Megjithatë, puna e tyre kërkon bashkëpunim të mëtejshëm dhe këtë e ka bërë të ditur sërish Dilo.
“Ky status i imi nuk është që ju të jepni like apo t’i thoni bravo këtyre çunave.
Ky status i imi është apel për ndihmë të tërë profesionistëve dentarë: kush disponon rezinë për printer ky është momenti kur duhet më shumë se kurrë!!! Nuk është momenti të prodhojmë dhëmbë apo proteza të bukura…është momenti të shpëtojmë jetë!!!”-ka shkruar ai duke i bërë thirrje laboratorëve të tjerë t’u vijnë në ndihmë me rezinë, lënda e domosdoshme për realizimin e prototipeve.
/iconstyle.al
