Sistemi i Bankës së Gjakut u mundëson dhuruesve nisur nga sot (fillimisht në Tiranë, Elbasan, Berat, Korçë dhe shumë shpejt në të gjitha qarqet e vendit) të rezervojnë online në e-Albania kohën dhe vendin e dhurimit të gjakut, si dhe të informohen në kohë reale për nevojat emergjente për dhurim, sipas grupit përkatës së gjakut
Çdo qese gjaku që futet në bankë pajiset me barcode dhe sistemi garanton sigurimin e automatizimit të plotë të ruajtjes, procesimit, marrjes dhe analizimit të informacionit, që lidhet me menaxhimin administrativ dhe inventarizimin e gjakut dhe produkteve të tij në të gjitha bankat e gjakut në Shqipëri
Ky proces pritet të shtojë edhe rezervat e gjakut, falë njoftimeve elektronike që do t’u mbërrijë dhuruesve periodikë dhe të rinj, në raste të rënies së nivelit të depozitave të gjakut sipas grupeve të gjakut. Për dhuruesit do të sigurohet edhe një historik i kontributit dhe analizave të kryera që mund ta konsultojnë në çdo kohë, në llogarinë e tyre
Si të rezervojmë?
- Zgjidhni “Rezervim për dhurim gjaku për individë dhe subjekte”
- Plotëso formularin elektronik duke zgjedhur orarin, datën dhe Bankën e Gjakut
- Pas dërgimit të kërkesës për rezervim, elektronikisht mbërrin njoftimi për konfirmimin e kohës dhe vendit të planifikuar për dhurim
Dhurues të gjakut mund të jenë të gjithë qytetarët, nga 18 deri në 65 vjeç, që ndihen plotësisht të shëndetshëm dhe që kalojnë testin e historisë së sëmundshmërisë përpara procesit
Një dhurim i gjakut të plotë zgjat mesatarisht 15 minuta dhe dhuruesi arrin të kompensojë brenda 24 orësh të gjitha lëngjet e humbura nga dhurimi i gjakut. Dhuroni gjak! Shpëtoni jetë!
