Një ngjarje e rëndë ka ndodhur sot në Kosovë ku si pasojë e shpërthimit të një bombole gazi në Ferizaj kanë mbetur të plagosur të paktën 42 persona, 11 prej të cilëve janë në gjendje rëndë në spital.
Ngjarja e rëndë ka ndodhur mesditën e sotme në restorantin ‘Steakhouse’ në lagjen ‘Village’ të Ferizajt.Mes të plagosurve ka edhe fëmijë, të cilët gjithashtu janë dërguar në spital, por ende nuk dihet numri i saktë i tyre. Të gjithë të plagosurit janë klientë dhe pjesëtarë të stafit të restorantit ku ndodhi shpërthimi dhe ndodheshin brenda tij në ato momente.
Për pasojë, ata kanë marrë dëme të mëdha në trup e fytyrë. Në lidhje me personat e plagosur nga shpërthimi kanë folur edhe disa mjekë në Kosovë që po merren me trajtimin e tyre. Ata kanë thënë se disa të plagosur janë në rrezik për jetën ndërsa 5 persona i janë nënshtruar sallës së operimit.
Në lidhje me shpërthimin që tronditi mbasditen e sotme qytetin e Ferizajt kanë reaguar edhe Kryeministri në detyrë Avdullah Hoti, Kreu i PDK-së Enver Hoxhaj dhe MInistri i Shëndetësisë Armend Zamaj ku kanë thënë se shpëtimi i jetëve është gjëja kryesore.
Kryetari i Komunës së Ferizaj Agim Veliu, ka vizituar të plagosur në spital. Nëpërmjet një statusi në rrjetin social “Facebook” , e ka konsideruar fatal shpërthimin e ndodhur, ndërsa i uron shërim të shpejtë të plagosurve.
