Në orët e para të mëngjesit të sotëm në Tiranë, pranë çerdhes numër 14 ka ndodhur një shpërthim i fuqishëm.
Sipas informacioneve që policia ka bërë publike deri më tani bëhet fjalë për shpërthimin e një bomble gazi në një dhomë që shërbente si magazinë në çerdhen nr.14 në rrugën “Ali Demi”.
Menjëherë pasi u sinjalizua ngjarja forca të shumta policie dhe zjarrfikëse shkuan në vendngjarje për të neutralizuar zjarrin.
Mësohet se zjarri është fikur dhe ka pasur vetëm dëme materiale. Ndërkohë prindërit janë shprehur të shqetësuar për sigurinë e fëmijëve të tyre në këto ambiente.
Policia ndodhet në vendngjarje dhe po punon për zbardhjen e plotë të ngjarjes.
Njoftimi i policisë
Informacion paraprak
Më datë 16.08.2018, rreth orës 04:57 në rrugën “Ali Demi”, në një dhomë e cila shërbente si magazinë për një çerdhe ka patur rënie zjarri.
Zjarri është fikur dhe ka patur vetëm dëme të vogla materiale.
Paraprakisht zjarri dyshohet të ketë rënën si pasojë e rrjedhjes së gazit nga një bombol gatimi.
Burimi: Balkanweb
