A është bota sot, fare pranë një dështimi moral, sa i takon çështjes së shpërndarjes së vaksinave kundër Covid-19? Kjo është pyetja alarmante që mund të ngrihet me të drejtë, në një kohë kur një pjesë e globit po vaksinohet, e ndërsa pjesa tjetër ende nuk e di se kur mund të mbërrijnë dozat e para.
Rrezik serioz, e ka cilësuar kreu i Organizatës Botërore të Shëndetësisë situatën në fjalë, atë të mosdhënies së barabartë të vaksinave duke publikuar shifra shokuese.
“Më shumë se 39 milionë doza të vaksinës janë shpërndarë tashmë në të paktën 49 vende të pasura. Vetëm 25 doza janë dhënë në një vend të varfër. Jo 25 milionë, jo 25 mijë. Vetëm 25”, tha Tedros Ghebreyesus, drejtor i përgjithshëm i Organizatës Botërore të Shëndetësisë.
A është e drejtë që të rinj të shëndetshëm në vende të pasura po vaksinohen kundër COVID-19 para të moshuarve në vende të varfëra?
Sipas Ghebreyesus-it, jo vetëm që ky vaksinim i pandershëm po i lë në rrezik vendet e varfëra dhe njerëzit në nevojë, por është gjithashtu vetëshkatërruese.
“Në fund të fundit këto veprime vetëm sa e zgjasin pandeminë, dhimbjen tonë, vuajtjen e njerëzve dhe të ekonomisë”.
Teksa disa vende filluan vaksinimin ndaj virusi që nga dhjetori, autoritetet shëndetësore në Afrikë shprehen se mund të duhen ende javë e ndoshta muaj për të marrë dozat e para.
Po Shqipëria ku është në këtë mes?
E ftuar mbrëmjen e djeshme në emisionin “Opinion”, ministrja e Shëndetësisë, Ogerta Manastirliu tha se sipas kontratës me Pfizer-in, në Shqipëri do të vijnë deri në shkurt, më shumë se 40 mijë doza të kësaj vaksine.
Më tej, Manastirliu u shpreh se pjesa tjetër e vaksinave nga kjo kontratë, rreth 460 mijë doza do të fillojnë të vijnë në fillim të korrikut.
Por si do të mbulohet periudha tjetër kohore?
Sipas ministres, në ndihmë do të na vijnë vaksina të siguruara me mekanizimin e Covax-it, si dhe nga negociata me kompani të tjera, që qeveria shqiptare është duke kryer.
