Young Dolph është reperi i njohur i cili vdiq vitin e kaluar më 7 nëntor, në Memphis, SHBA.
Një dëshmitar okular tha se muzikanti 36-vjeçar u qëllua nga persona të paidentifikuar teksa po hynte në një dyqan.
Ai u shpall i vdekur në vendngjarje, sipas një postimi në “Twitter” nga policia e Memphisit.
Ditën e sotme u zbardh autopsia e vdekjes së reperit e cila zbuloi se ai ishte qëlluar me 22 plumba, në qafë, trup, shpinë dhe krahë. Vdekja e tij është konstatuar si një vrasje.
Rita Myers, tezja e Dolph-it i tha “Rolling Stone” pasi detajet e autopsisë u shfaqën se:
“Është një situatë e vështirë për t’u kuptuar. Kjo na kthen në fillim. Familja jonë ka pësuar një humbje të jashtëzakonshme, sepse ai ishte që e mbajti familjen tonë të bashkuar”.
Reperi, emri i vërtetë i të cilit është Adolph Robert Thornton, është mjaft i njohur në komunitetin e Memphis.
Dolph filloi të merrte vëmendjen kombëtare në vitin 2014 me publikimin e ‘mixtape’-t të tij “High Class Street Music 4” dhe këngën “Preach”.
Albumi i tij i parë, i publikuar në vitin 2016, u titullua “King of Memphis”.
Dolph ka qenë në shënjestër e një atentati dhe në të kaluarën. Në vitin 2017, ai u godit nga plumba të shumtë teksa ndodhej jashtë një dyqani këpucësh në Hollywood, duke marrë plagë në krahë.
