Një ngjarje e rëndë është shënuar rreth orëve të para të mëngjesit të sotëm në Tiranë, ku shtëpia e gazetares së “News 24” Klodiana Lala, është sulmuar me breshëri automatiku.
“BalkanWeb” raporton se persona të paidentifikuar kanë qëlluar me breshëri në drejtim të banesës në lagjen “Bruk” në periferi të Tiranës, ku jetojnë prindërit e gazetares.
Fatmirësisht nuk ka të lënduar, edhe pse plumbat mësohet të kenë prekur muret e banesës dhe kasën e derës së jashtme të saj.
Në këtë moment, gazetarja nuk ndodhej në banesë pasi kishte qëndruar aty me bashkëshortin deri në orët e vona të mbrëmjes së djeshme. Në banesë ndodheshin familjarët e gazetares Lala, prindërit e saj, vëllai, motra si edhe dy vajzat e saj, të cilat shkojnë shpesh tek gjyshërit.
Nuk dihet nëse ky sulm i frikshëm ka lidhje me ndonjë investigim apo lajm të gazetares, por ajo që dihet qartë është se ky sulm është mirëfilli një kërcënim ndaj fjalës së lirë dhe të drejtës për t’u shprehur.
Klodiana Lala njihet si një ndër gazetaret investigative më në zë në Shqipëri, e cila herë pas here ka hedhur dritë mbi skandale të përmasave të mëdha në lidhje me pushtetarë apo grupet kriminale që veprojnë në Shqipëri.
Dyshohet se ky sulm lidhet pikërisht me profesionin e saj dhe kjo nuk është hera e parë që cënohet siguria e një gazetari në vendin tonë. Vetëm pak vite më parë, gazetari investigativ Artan Hoxha u mor në mbrojtje nga policia për shkak të disa mesazheve ku kërcënohej me jetë, ndërsa në vitin 2017, pas një emisioni ku ai foli për bandat në Elbasan, Hoxha u kërcënua me jetën e të birit.
