Ngjarja shokuese që ndodhi mesnatën që lamë pas në Karakaq të Komunës së Kamenicës, ku babai rrahu për vdekje të birin 14-vjeçar, tronditi mbarë opinionin.
Sipas njoftimeve të policisë së Kosovës, 60-vjeçari, Gani Bernjashi rrahu për vdekje djalin e tij 14 vjeçar dhe dhunoi fizikisht edhe vajzën 17 vjeçare.
Ndërkohë trupi i pajetë i 14-vjeçarit, i cili u vra nga babai i është kthyer familjes për organizimin e ceremonisë mortore pas kryerjes së autopsisë. Ai pritet të varroset gjatë ditës së sotme.
Mirëpo sipas gazetës “Express”, ky nuk është krimi i parë që 60-vjeçari ka bërë. Në vitin 1997 ai u vendos në Prishtinë dhe dhunoi një vajzë të mitur 12 vjeçare. Për këtë akt të tmerrrshëm ai vuajti dënimin me burg deri në vitin 2004.
“Ne i kemi intervistuar familjarët, ndaj të dyshuarit kemi vënë masën e paraburgimit prej 48 orëve. Për personin thuhet të ketë qenë problematik. Ka kërkuar para, por nuk është se ka pasur nevojë për to, ngaqë kushtet financiare nuk i kanë pasur dhe aq keq. Për të kemi informata se gjatë viteve 90’-të ka dhunuar edhe një të mitur”, ka thënë për gazetën “Express” Prokurori i krimeve të rënda në Gjilan, Shaban Spahiu.
Ganiu është i martuar me një grua me nacionalitet boshnjake, dhe nga kjo martesë kishin një djalë dhe dy vajza. Ai prej një kohe të gjatë ka qenë lypës në rrugët e Prishtinës dhe Mitrovicës. Banorët e fshatit ku jetonte e njihnin Ganiun si një person jo të qetë.
“Nuk kemi pasur muhabet me atë person. Ai para shumë viteve kishte dhunuar një vajzë. Kërkonte para, por kushtet në shtëpi nuk i kishte pasur të këqija. Dy trualle i kishte të blera dhe del tash e mbyt djalin e tij të vetëm, kjo është makabër. Jemi të shokuar nga kjo”, është shprehur njëri prej fqinjëve të tij.
Familja e Gani Bernjashovit është dalluar edhe më parë për histori të tilla tronditëse. Babi i Ganiut, para 30 viteve mbyti dy vajzat e tij.
“Para disa viteve babai i Ganiut i ka mbytur dy vajzat e tij”, thonë fshatarët e Karaqevës.
Ganiu tashmë gjendet në qendrën e paraburgimit në Gjilan dhe pritet që për të nis një proces gjyqësor nga Prokuroria e shtetit. Ndërkohë janë bërë të gjitha ekzaminimet në vendin e ngjarjes, si dhe shumë shpejt pritet që të publikohen edhe detajet e tjera.
Burimi: Gazeta Express
