Ka shumë nga ata që mendojnë se virusi COVID-19 është një mashtrim dhe nuk është aspak i vërtetë!
Të tilla pohime kanë rënë edhe në veshin e mjekes që punon tek Sanatoriumi, Loreta Bica, e cila sot ka një thirrje për të gjithë ata që pyesin: “E vërtetë është”?
Mjekja u bën thirrje të gjithë qytetarëve që të vendosin maskat, pasi është një nga masat më efikase për të parandaluar përhapjen e Covid 19.
Mesazhi i mjekes është shpërndarë në rrjetet sociale nga Ministrja e Shëndetësisë, Ogerta Manastirliu.
“Jo rrallë dëgjoj të pyetet: E vërtetë? Në pak ditë shoh një spital të mbushet frikshëm me të sëmurë në gjendje të rëndë! Shoh mjekë, infermierë, sanitare që luftojnë për të lehtësuar dhe për të shpëtuar sa më shumë jetë. Duket sikur e kanë harruar rrezikun e madh që i kërcënon në luftën me Covid-in.
Me të vërtetë e frikshme. Por COVID-9 është armik shumë i dobët, nëse e luftojmë të gjithë bashkë! Ju lutemi mbroni jetët tuaja dhe jetët tona, thjeshtë duke vendosur maskën. Së bashku mund dhe do t’ia dalim”, bën thirrje mjekja Loreta Bica.
