Nëpërmjet një videomesazhi, kryeministri i vendit, Edi Rama, ka bërë të ditur një mënyrë të re dhe më të lehtë regjistrimi për fëmijët që do të nisin shkollën.
Tashmë, aplikacioni e-Albania i vjen në ndihmë të gjithë prindërve që duan të regjistrojnë fëmijët e tyre në klasë të parë. Regjistrimi mund të bëhet nëpërmjet e-Albania, duke shmangur pritjen dhe radhët e gjata.
Kjo procedurë do të zgjasë vetëm një minutë dhe nuk është nevoja të trokisni në dyert e institucioneve arsimore. Pasi të plotësohen të gjitha informacionet që kërkohen dhe të bëhet aplikimi, kërkesa e secilit do të shqyrtohet nga institucioni arsimor përkatës.
Në videon e publikuar në llogarinë e Ramës në Facebook, shpjegohet çdo hap i kësaj procedure të regjistrimit, për t’ia bërë më të lehtë qytetarëve.
“Mirëmëngjes. Me lajmin e mirë se erdhi dita të regjistrojmë fëmijët në shkolla, por pa mbledhur më një tufë me letra nëpër duar e pa mbajtur më radhë në asnjë derë institucioni arsimor, ju uroj një ditë të mbarë”, shkruan Rama krah videos së publikuar.
Për më tepër, mund ta ndiqni vetë në videon e mëposhtme procesin e shkurtër të regjistrimit për herë të parë të fëmijëve në shkolla nëpërmjet aplikacionit e-Albania.
