Për garantimin e jetës së pushuesve shqiptarë e të huaj, si dhe për parandalimin e aksidenteve rrugore, Policia e Durrësit ka organizuar një plan masash në disa nga akset rrugore që për policinë konsiderohen si më problematiket.
Kreu i Policisë Rrugore në Durrës, Valentin Florini shprehet se si akse më problematike janë ato Maminas-Gjiri i Lalzit, Fushë-Krujë e Thumanë.
“Akset kryesore dhe më problematike janë Maminas-Gjiri i Lalzit, Maminas-Unaza e Shkozetit, Plepa-Golem- Ura e Gjoles, Fushë Krujë-Thumanë. Në këto akse janë me shërbim të përforcuara dhe monitorim për menaxhimin e trafikut”, tha ai.
“Gjithë këto masa janë marrë për të ulur dhe parandaluar numrin e aksidenteve. Krahasuar me 6-mujorin e vitit 2018 kemi një ulje të numrit të aksidenteve mbi 40%, nga 102 aksidente që ishin një vit më parë kemi 60 aksidente dhe kjo ka ardhur si shkak i një analize që ka bërë policia e Durrësit dhe vendosja e shërbimeve në ato “njolla të zeza”, tha kreu i Policisë Rrugore në Durrës, Valentin Florini.
Ai u bëri apel të gjithë drejtuesve të tregojnë kujdes gjatë kohës që udhëtojnë, jo vetëm me shpejtësinë tej normave të lejuara, por edhe në përdorimin e celularit.
/Report tv
