Marina e Ukrainës thotë se janë gjallë 13 ushtarët që besohet se janë vrarë duke mbrojtur ishullin Zmiinyi (Gjarpri) në ditën e parë të pushtimit rus.
Rojet kufitare u nderuan pas vdekjes nga presidenti pasi u dëgjuan në regjistrimet audio duke i thënë një luftanijeje ruse “shkoni p*rdhuni”.
Rusia tha në atë kohë se trupat në ishull u dorëzuan.
Ndërkohë, autoritetet ukrainase kanë bërë me dije se janë kapur nga pushtuesit rusë.
“Ne jemi shumë të lumtur të mësojmë se vëllezërit tanë janë gjallë dhe mirë,” tha Marina e Ukrainës në faqen zyrtare në “Facebook”.
Rojet e kufirit dhe marinsat në ishull “i zmbrapsën me guxim dy herë sulmet e pushtuesve rusë”, por nuk ishin në gjendje të vazhdonin luftimin sepse iu mbaruan municionet, thuhet në deklaratë.
Rusët shkatërruan plotësisht infrastrukturën e ishullit, duke përfshirë faret, kullat, antenat dhe ndërprenë komunikimet me kontinentin, shtoi ai.
Marina ukrainase akuzoi gjithashtu forcat ruse për ndalimin e paligjshëm të ekuipazhit të një anijeje civile të kërkim-shpëtimit që Ukraina dërgoi në ishull me një mision humanitar pas sulmit, si dhe dy priftërinj që po i shoqëronin.
“Kapja e paligjshme e një anijeje civile jo-luftarake që nuk ka kryer asnjë mision ushtarak është një shkelje e rregullave dhe zakoneve të luftës dhe ligjit ndërkombëtar humanitar,” paralajmëroi ai.
