Pasiguria për një valë të dytë të koronavirusit në vjeshtë, e bën vendimin për hapjen e shkolave në shtator, të nxituar dhe politik.
Kështu është shprehur epidemiologu Alban Ylli për A2 CNN, i cili tha se për momentin në Shqipëri situata është ende nën kontroll dhe në shtator do të ketë një frenim të rasteve, për t’u rritur më vonë.
Gjithsesi, në prag të vitit shkollor, epidemiologu mbetet skeptik dhe shprehet se shkollat duhet të qëndrojnë të mbyllura.
“Të ishte për mua, unë do t’i mbaja të mbyllura shkollat. Vendimi është politik, balanca midis rrezikut mjekësor dhe humbjes së një gjenerate që nuk po i kthehet bankave”, thotë ai.
Pamundësia e rikthimit në karantinë e cila u theksua edhe nga kryeministri Rama, duhet të na bëjë më të vëmendshëm në respektimin e masave të distancimit social dhe mbajtjen e maskës.
“Lockdown-i u mor si masë nga të gjithë vendet sepse mendohej se virusi kishte karakter respirator dhe që në verë do të pakësohej. Kjo nuk ka ndodhur, dhe tashmë jemi të detyruar në kushte të pamundësisë të një lockdoën-i të dytë, të zbatojmë masat e distancimit social që në një mënyrë ndihmon imunitetit e tufës. Edhe pse duhet të presim gjithsesi vaksinën” .
Teksa na ndajnë vetëm pak ditë nga fillimi i shkollës, duket se rikthimi në shkolla është mundësia e vetme që kemi, pasi nxënës, mësues dhe prindër u shprehën të pakënaqur me mësimin online të karantinës.
Sipas një sondazhi të publikuar nga iconstyle.al, vetëm 63% e pjesëmarrësve ishin dakord për hapjen e shkollave me kushtin e vetëm që të respektohen masat. Pjesa më e madhe e tyre ishin zhgënjyer nga mësimi online i karantinës, që u cilësua si një dështim total i Ministrisë së Arsimit.
Rikthimi në shkollë në kulmin e pandemisë nuk është zgjedhje e tyre me dëshirë, por zgjidhje nga halli që i japin problemit të shkollimit. Dhe kjo shifër, që përkthehet në jetë njerëzish në periudhë pandemie, do të ulet shumë më shumë kur këta njerëz, (që qeveria mendoi se iu plotësoi dëshirat për të marrë mandatin), të përballen me pasojat që do të sjellë vendimi i nxituar i hapjes së shkollave, që rrjedhimisht do të paguhet me votë.
