Viktima më e re e COVID-19 në Shqipëri na tregoi se virusi nuk pyet për moshën dhe se duhet ta marrim më seriozisht se kurrë pandeminë! E ndërkohë që lajmi për vdekjen e vajzës së re, i tronditi të gjithë sot, disa detaje të reja janë zbuluar në lidhje me shtrimin e saj tek Infektivi.
Dosja.al shkruan se e reja ishte paraqitur për herë të parë para katër ditësh në spital, pasi ankohej se kishte një dhimbje koke të vazhdueshme. Pas tamponit të kryer, 21-vjeçarja kishte rezultuar pozitive me COVID-19 dhe nisur nga gjendja e saj e rënduar mjekët e kishin vendosur në intubim.
Përkeqësimi i gjendjes së të resë si pasojë e tromboembolisë fulminante dhe sindromit metabolik, bëri që 21-vjeçarja ta humbte betejën me virusin.
Sindroma metabolike është një grup i gjendjeve – presioni i lartë i gjakut, sheqeri i lartë në gjak, yndyrë e tepërt trupore rreth belit, dhe nivelet e larta të kolesterolit ose triglicerideve – që paraqiten së bashku, duke rritur rrezikun e sëmundjeve të zemrës, goditjes në tru dhe diabetit.
Ndërkohë gjatë 24 orëve të fundit janë shënuar edhe tre viktima të tjera, një 49 vjeçare nga Kruja, e intubuar në gjendje të rëndë prej 11 ditësh dhe dy qytetarë, 56 dhe 67 vjeç, nga Tirana të intubuar.
85 persona të tjerë janë konfirmuar më Covid-19. Aktualisht janë të shtruar 88 pacientë në spital, 12 pacientë janë në terapi intensive dhe 4 prej tyre janë të intubuar në gjendje të rëndë.
