Studimi i parë i disa studiuesëve kinezë mbi COVID-19 ka përcaktuar se virusi agresiv vret në një mesatare prej 18.5 ditësh.
Studiuesit kanë ekzaminuar të dhënat e 191 pacientëve në spitalin e Wuhan-it dhe rezultoi se koha mesatare e daljes së pacientëve nga spitali ishte 22 ditë, ndërsa ajo e vdekjes ishte 18.5 ditë.
Kohëzgjatja mesatare e temperaturës tek pacientët e mbijetuar ishte 12 ditë, e ngjashme me atë të viktimave, por rezultoi se thuajse gjysma e të shëruarve vijonin të kishin kollë edhe pas shërimit.
Vështirësitë në frymëmarrje sakaq, përmirësohen rreth ditës së 13-të.
Për personat që nuk ia dolën të mbijetojnë, infektimi i përgjithshëm nisi rreth ditës së 9-të, ndërsa dëmet akute në veshka dhe zemër rreth ditës së 15-të.
Gjithashtu u zbulua se pacientët që ia dolën të mbijetojnë, mund t’ja ngjisnin virusin të tjerëve për 37 ditë, shumë më tepër nga sa besohej fillimisht.
Profesori Bin Cao, nga Spitali i Miqësisë Kinë-Japoni u shpreh: “Shpërndarja e zgjeruar virale e vërejtur në studimin tonë ofron të dhëna të rëndësishme për të orientuar vendimet mbi masat e izolimit dhe trajtimet antivirale tek pacientët e konfirmuar me COVID-19. Sugjerojmë që testet negative për COVID-19 të kërkohen përpara se pacientët të largohen nga spitali.”
Ashtu siç është thënë dhe më parë, ky studim ka konfirmuar se tek pacientët e infektuar me koronavirus, sëmundje të tjera kronike si diabeti e hipertensioni janë faktorë të rëndësishëm në vdekjet e regjistruara.
Në rastet më të rënda, gjithashtu është vënë re prania e ulët e rruazave të bardha të gjakut, nivele të larta të Interleukin 6 (që dëshmon inflamacionin e lartë dhe sëmundjet kronike) dhe përqëndrim i troponinës I me sensibilitet të lartë (që dëshmon atakun kardiak).
Studiuesit sugjerojnë se këto të dhëna tejet të rëndësishme mund të përdoren për të përcaktuar se cilët pacientë janë në rrezik më të lartë.
(Studimi i publikuar në revistën mjekësore “The Lancet”)
