Ura e Zogut në Milot e ndërtuar në vitin 1927 dhe që mban statusin Monument Kulture është shkatërruar totalisht pas reshjeve të dendura të këtyre ditëve të fundit. Prurjet e shumta të lumit kanë bërë që një nga këmbët e urës të fundoset në lum me rreth 2 metra. Për pasojë i gjithë monumenti ka lëvizur, ndërsa traseja në anën veriore është spostuar me rreth një metër dhe ka pësuar plasaritje.
Mirëpo nuk ishin shirat që ndikuan në degradimin e këtij monumenti kulture, por në fakt ato nxorën zbuluar punën e dobët të Ministrisë së Kulturës dhe institucioneve në varësi të saj. Prej vitesh për urën e Zogut është ngritur alarmi se po shkonte drejt shkatërrimit dhe pavarësisht kësaj nuk është bërë asnjë lloj investimi. Si një moment kulture kjo urë mbrohet me status nga vetë shteti, por deri më sot shteti ynë ka qëndruar duarkryq dhe nuk ka bërë as lëvizjen më të vogël për të shpëtuar këtë vepër të rrallë arkitekturore.
Shirat treguan se për vite me radhë nuk është hedhur asnjë lekë për ruajtjen dhe restaurimin apo rikonstruksionin e monumenteve të kulturës. Ura e Zogut prej kohësh është shkatërruar për shkak të gërryerjeve në lumin Mat dhe personave të papërgjegjshëm që kanë marrë pjesë metalike të saj për t’i shitur. Përveçse nuk ka investuar në të dhe në asnjë monument tjetër kulture, shteti ynë nuk ka bërë as përpjekjen më të vogël për t’i mbrojtur e marrë masa ndaj këtyre njerëzve.
Ura e Zogut është një nga më të veçantat në vendin tonë për strukturën e saj arkitekturore. Stili i harqeve i japin asaj vlerë muzeore. Ajo është ndërtuar nga një inxhinier italian dhe ka marrë emrin e Mbretit Zog, pasi ai ishte vetë ideatori për ndërtimin e urës. Në ato vite ura ishte një portë e domosdoshme për të hyrë në Shqipërinë e Epërme që përfshin Shkodrën, Lezhën, Mirditën, Tropojën, Kukësin, Pukën etj.
