Prej shpërthimit të koronavirusit në vendin tonë pjesa më e madhe e bizneseve kanë qëndruar të mbyllur.
Disa prej tyre me lehtësimin e masave kanë nisur hapjen graduale, por një prej sektorëve më fitimprurës, ai i lokaleve vazhdon ende të qëndrojë i mbyllur.
Qeveria ka paralajmëruar hapjen e tyre pas 18 majit, por bëhet fjalë për restorantet dhe baret e hapur në natyrë, çka nënkupton se një pjesë e madhe e tyre do të nisin modifikimet për t’u përshtatur me rregullat e reja dhe rrjedhimisht me shpenzime të mëdha.
Në një komunikim me përfaqesuesin e shoqatës së bareve dhe restoranteve, iconstyle.al mesoi se kriza ekonomike do të shkaktojë një dëm të madh në këtë sektor.
Parashikohet që 30-50% e ketyre bizneseve mund te mbyllin dyert pasi nuk do të mbulojnë dot shpenzimet.
Kjo sjell një dëm edhe më të madh për xhepat e punëtorëve, pasi e gjitha përkthehet në një ushtri të papunësh dhe në një humbje jashtëzakonisht të madhe për këtë sektor.
Ndonëse gjatë kësaj periudhe të vështirë pronarët janë përpjekur të mos largojnë nga puna të punësuarit, sidomos ata që kanë vite dhe janë familjarizuar, ata në rast se s’do të ketë mbështetje për këtë sektor do jenë të detyruar të bejnë shkurtime.
Një shqetësim tjetër për pronarët e bizneseve të këtij sektori është edhe kufizimi i orarit, pas rihapjes ata do të qëndrojnë të hapur deri më orën 17:30.
Për këtë çështje, mësohet se shoqata e bareve, restoranteve dhe club-eve që deri më tani ka ngritur disa herë zërin, do të dalë sërish me nje deklaratë.
“Shoqata do të dalë sërish me një deklaratë që po merr formën e një proteste virtuale, për të kërkuar rishikim të kufizimit të orarit”, tha përfaqësuesi i shoqatës.
Së fundmi kryetari i sektorit të hoteleve, Zak Topuzi kërkoi publikisht një paketë të 3-të urgjente për baret dhe restorantet, të cilët janë goditur dhe do të goditen nga pandemia e koronavirusit.
Shoqata ka pasur një takim të rëndësishëm me ministrin e Sipërmarrjes, Eduart Shalsin, ndërsa në javët në vazhdim parashikohet që shoqata të ketë takim me ministrin Arben Ahmetaj dhe ministren e Financave Anila Denaj, ku shpresohet se do t’i japin zgjidhje kësaj situate tepër të rëndë.
