Shiu i dendur dhe përmbytjet në Aswan, Egjipt, kanë shtyrë akrepat “të kërkojnë strehim” në shtëpitë e njerëzve. Tre persona vdiqën dhe më shumë se 400 u shtruan në spital në të gjithë qytetin për të marrë trajtim kundër helmit pasi u pickuan nga akrepët, sipas mediave shtetërore.
Megjithatë, ministri në detyrë i Shëndetësisë Khalid Abdel-Ghafar tha në një deklaratë se nuk u raportua asnjë vdekje nga pickimi. Ministria e Shëndetësisë ka siguruar publikun se ka një rezervë mjaft të madhe anti-helmi, duke vënë në dukje se 3,350 doza ishin në dispozicion në Aswan.
Reshjet dhe përmbytjet pasuese kanë detyruar gjithashtu autoritetet lokale të pezullojnë shkollat, tha guvernatori Ashraf Attia.
Njerëzit që u pickuan nga akrepat thanë se simptomat e tyre përfshinin dhimbje të forta, ethe, djersitje, të vjella, diarre, dridhje muskulore dhe dridhje koke.
Malet e Asuanit janë shtëpia e akrepit arab me bisht të dhjamosur, ose Androctonus crassicauda, që përkthehet nga greqishtja në “njeri-vrasës”. Ata konsiderohen ndër akrepat më të rrezikshëm në botë, me një helm shumë toksik që mund të vrasë një të rritur brenda një ore nga pickimi. Dihet se thumbimi i tyre shkakton disa vdekje në vit.
Akrepi është 8-10 cm i gjatë dhe mbështetet në dridhjet dhe zërin për të gjetur prenë e tij pasi ka vizion, dëgjim dhe nuhatje të dobët.
Fotot dhe pamjet video që qarkullojnë në mediat sociale tregojnë rrugë të përmbytura dhe shtëpi, automjete dhe ferma bujqësore të dëmtuara.
E përditshmja Al-Ahram raportoi vdekjet, duke cituar Ehab Hanafy, nënsekretarin e Ministrisë së Shëndetësisë në Asëan. Nuk ka dhënë detaje për shkakun. Reshjet kanë shkaktuar edhe ndërprerje të energjisë elektrike.
