Dekani i Fakultetit Ekonomik, Dhori Kule ka sqaruar sherrin e ndodhur me studentët e Fakultetit Ekonomik, pas të cilit 3 të rinj përfunduan në spital të plagosur.
Kule ka thënë për mediat se sulmuesit nuk kanë qenë studentë të grupit, dhe kur kjo është vënë re nga pedagogia, studentët kanë kërkuar largimin e tyre.
Pasi u largua grupi ka pritur të mbarojë mësimi për t’i sulmuar studentët jashtë ambienteve të një godine shtetërore të QS-së.
Dhori Kule shprehet se policia duhet të ketë edhe video të grupit që ka sulmuar studentët.
Deklarata e plotë e Dhori Kules:
“Në të gjitha ambientet ka shërbim të policisë private, por në ambientin ku ka ndodhur ngjarja, është policia e Qytetit Studenti. Pedagogia më tha se kur dola i thashë rojës se këta jashtë që po dalin kanë ndërmend ndonjë sherr. Ai tha se përgjigjem për situatën brenda, si duket ka qenë roja i godinës. Kudo ka roje, te salla që zhvillojmë seminaret në QS janë me roje. Kush i ka dërguar? Kanë spekuluar. Studentët nuk i kanë pranuar. Hyrja në sallë mund të guxojë kushdo të futet dhe nga apeli dalin ata që nuk janë. Ata nuk kanë qenë studentë të atij grupi.
Pedagogia u ka thënë se nuk jeni studentë këtu dhe grupi nuk i ka pranuar. Grupi ka reaguar duke i nxjerrë jashtë, dhe pasi ka mbaruar mësimi një grup më shumë se dy veta kanë guxuar të godasin studentët. Njëri është trajtuar te Trauma, ka dalë, i kam dërguar haber që mundësisht të paraqitet në mënyrë që ta sqarojmë të gjithë panoramën dhe t’i sigurojmë të gjithë studentët që përmes strukturave të policisë private dhe të shtetit që të mos i shkojë në mendje dikujt të dhunojë studentet. Policia duhet të ketë edhe filmime të grupit që ka guxuar, do ishte gjë e mirë ta sqaronim”, tha Kule gjatë një deklarate për mediat.
