Sot në mesditë në qytetin e Shëngjinit u regjistrua një ngjarje kriminale në oborrin e resortit ku janë strehuar refugjatët afganë. Policia bën të ditur se një 26-vjeçare ka plagosur me thikë bashkëjetuesin pas një konflikti mes tyre.
Shkaku ende nuk bëhet i ditur, pasi autorja po merret në pyetje nga policia lokale. Ndërsa 33-vjeçari ka plagë në bark, të shkaktuara nga thika, por sipas konfirmimit të bluzave të bardha është jashtë rrezikut për jetën.
Njëzet vite më parë një koalicion forcash ushtarake të drejtuar nga SHBA-të rrëzuan Talebanët nga pushteti në Afganistan. Por pas një ofensive ushtarake të muajve të fundit grupi islamik po rimerr pushtetin.
Kjo ndodh teksa SHBA po përgatitej të tërhiqte trupat ushtarake pas 20 vitesh luftë. Sipas një marrëveshjeje të dakordësuar tërheqja e plotë do të përmbushej më 11 shtator.
SHBA hyri në bisedime me Talebanët që në vitin 2018 për të diktuar një fazë tranzicioni dhe paqeje pas largimit të tyre. Bisedimet u shtynë përpara në vitin 2020 kur palët arritën një marrëveshje në Doha të Katarit.
Në marrëveshje SHBA zotohej të tërhiqte trupat. Talebanët zotoheshin të mos i sulmonin, të mos lejonin ri-aktivizimin e grupit al-Qaeda, apo militantëve të tjerë ekstremistë si dhe të vijonin bisedimet me palët e tjera politike për drejtimin e vendit në paqe.
Vitin që vijoi talebanët vijuan të sulmonin forcat afgane të sigurisë dhe civilë në rrethina të vendit. Situata përshkallëzoi muajt e fundit teksa në 14 Gusht ata morën edhe Kabulin.
Kjo ishte edhe arsyeja se pse afganët filluan të vinin në Shqipëri që nga fundi i Gushtit , pasi talebanët morën pushtetin atje dhe jeta e tyre rrezikohej.
