Një tjetër ngjarje e rëndë me protagonistë të rinj ka ndodhur diten e sotme pranë ambienteve të gjimnazit “Ibrahim Rugova” në Kamëz. Një konflikt mes nxënësve është përshkallëzuar në një përplasje të dhunshme fizike, e cila ka ndodhur në rrugë, shumë pranë hyrjes së shkollës.
Sipas raportimit nga gazetari Besar Bajraktaraj për Klan News, dy nxënës janë plagosur si pasojë e përdorimit të sendeve të forta dhe të mprehta, çka e ka bërë përplasjen edhe më të rrezikshme dhe ka alarmuar banorët e zonës dhe komunitetin shkollor.
Ngjarja ka ndodhur gjatë paradites, në një orar të afërt me mësimin, ndërsa dëshmitarë nga vendi i ngjarjes tregojnë për një përplasje të nisur fillimisht me fjalë, që më pas ka degjeneruar në dhunë fizike, ku janë përdorur objekte të rrezikshme.
Dy nxënësit e plagosur janë transportuar menjëherë në spitalin e Traumës në Tiranë, ku po marrin trajtimin e nevojshëm mjekësor. Burime nga spitali bëjnë me dije se gjendja e tyre është e qëndrueshme, edhe pse njëri prej tyre ka marrë plagë më serioze në pjesën e barkut.
Policia mbërriti me urgjencë në vendngjarje dhe ka nisur hetimet për të zbardhur rrethanat e përplasjes. Të dy nxënësit e përfshirë janë identifikuar, ndërsa po hetohet nëse ka edhe persona të tjerë të përfshirë apo nxitës të konfliktit.
