Është shënuar një tjetër viktimë sot në spitalin e Infektivit dhe lajmin e trishtë e ka konfirmuar vetë vëllai i pacientit, i cili i tronditur kërkon transparencë nga mjekët për situatën brenda spitalit.
Në një prononcim për “News24”, vëllai i viktimës ka denoncuar mungesën e stafit mjekësor dhe infermieror në këtë spital, që sipas tij nuk mjafton për të përballuar numrin e të shtruarve.
Ai tregoi se i vëllai kishte ardhur me këmbët e veta në spital, në gjendje të mirë para dy javësh, por sot kishte ndërruar jetë. Sipas tij, ende nuk dihet nëse viktima ishte pozitiv me koronavirus apo jo, dhe se as të afërmve të tij nuk ju është bërë ende tamponi.
“Heronj janë doktorët e infermierët por e kanë të pamundur me kapacitetin, ka pak staf me raportin e të shtruarve. Kam komunikuar përmes anës shoqërore me infermieret, ka nevojë çdo njeri ti ketë te koka infermierët jo me shkuar me i pa. Ana tjetër këtu është mungesa e familjes, këtu kanë mbyll dyert, këtu shteti ka rënë se ka dy javë unë në familjen teme atje ku vëllai im është sëmurë se dimë ca ka aty brenda, thotë do vijmë t’ja bëjmë ndonjërit, asnjërit nuk ia kane bere deri tani, as vëllait tim që ka vdekur sot.
Ai ka ardhur shëndoshe me këmbët e veta ka dal sot i vdekur, nuk e dimë nga çfarë ka vdekur, ka ardhur duke folur, s’ka pasur asnjë sëmundje tjetër, as ka pirë duhan e alkool, del sot i vdekur, kush është shkaku? Vërtet sëmundja bën punën e vet por shërbimi duhet të jetë i saktë, ku është shteti? Futu gjallë e del i vdekur? E pruna shëndoshë e nxjerr të vdekur, asnjë informacion s’ka në derë, s’dimë ca bëhet brenda, ai u bë më mirë, a ka nevojë për gjë, s’ka asnjë informacion vetëm Zoti të ndihmoftë”, tha vëllai i viktimës.
