Ish-drejtoresha e Inteligjencës Kombëtare Amerikane, Tulsi Gabbard, ka njoftuar dorëheqjen e saj nga detyra, duke zbuluar një arsye thellësisht personale dhe prekëse që lidhet me shëndetin e bashkëshortit të saj.
Në një letër zyrtare dorëheqjeje, Gabbard bëri të ditur se bashkëshorti i saj, Abraham, është diagnostikuar me një formë jashtëzakonisht të rrallë të kancerit të kockave, çka e ka shtyrë të marrë vendimin për t’u tërhequr nga shërbimi publik për t’i qëndruar pranë në këtë periudhë të vështirë.
“Burri im, Abraham, është diagnostikuar me një formë jashtëzakonisht të rrallë të kancerit të kockave. Ai do të përballet me sfida të mëdha në javët dhe muajt e ardhshëm. Në këtë moment, duhet të largohem nga shërbimi publik për të qenë pranë tij dhe për ta mbështetur plotësisht në këtë betejë”, thuhet në letrën e saj.
Sipas raportimeve, Gabbard e ka informuar Presidentin Donald Trump gjatë një takimi në Zyrën Ovale për vendimin e saj, ndërsa dita e saj e fundit në detyrë do të jetë më 30 qershor.
Në letrën e saj, ajo shprehu gjithashtu mirënjohje për besimin e dhënë gjatë kohës që drejtoi Zyrën e Drejtorit të Inteligjencës Kombëtare.
“Jam thellësisht mirënjohëse për besimin që më është dhënë dhe për mundësinë për të udhëhequr këtë institucion gjatë një viti e gjysmë të kaluar”, u shpreh ajo.
Lajmi për dorëheqjen e saj ka tërhequr vëmendje të madhe në SHBA, pasi vendimi nuk lidhet me arsye politike apo institucionale, por me një situatë familjare të ndjeshme dhe nevojën për të qenë pranë bashkëshortit në një nga momentet më të vështira të jetës së tyre.
Dorëheqja e Gabbard pritet të hapë diskutime mbi pasuesin e saj, ndërsa ajo vetë ka zgjedhur të largohet nga skena publike për t’u fokusuar tek familja dhe shëndeti i bashkëshortit.
