Shkollat të kalojnë plotësisht online. Ky është propozimi i Shefit të Laboratorit të Mikrobiologjisë, Andi Koraqi.
Në një intervistë televizive, Koraqi thotë se, “Kapacitetet spitalore janë shumë lart ezaurimit. Masat për mendimin tim janë mëse të mjaftueshme por megjithatë unë do të avancoja pak më përpara dhe do të thosha që mësimi të kalohej në të gjitha shkollat online. Megjithatë ky është një vendim që e merr qeveria dhe nuk varet nga mendimi i një individi”.
Sipas ekspertit, nuk dihet ende se kur do të nisë rënia e kurbës së infektimeve pasi për të thënë një gjë të tillë me siguri do të duhet krijimi i imunitetit të popullatës.
Koraqi deklaroi se, “që kjo të arrihet duhet që coronavirusin ta ketë kaluar 40-50% e popullatës, por deri tani niveli i infektimit është deri në 20-25%”.
Për masat që janë marrë deri tani, doktori thotë se kufizimet vendosen në bazë të disa indikatorëve që janë pozitiviteti i testimeve dhe kapacitetet spitalore.
Lidhur me testimet, shefi i Laboratorit të Mikrobiologjisë tha se nuk duhet shtuar numri i testimeve, por i rëndësishëm është gjurmimi i kontakteve që kanë pasur rastet pozitive pasi vetë testimi është një fotografi e situatës aktuale.
Për frikën e riinfektimit nga COVID-19, mjeku tha se deri tani në botë janë vërtetuar tre raste që janë prekur dy herë nga virusi. Por, z. Koraqi solli dhe rastin e një pacienti të tij që ishte prekur dy herë.
“Një opinion i përgjithshëm është se sars-covid-2 lë një imunitet jo të përhershëm. Është e paqartë se sa zgjat imuniteti. Deri tani janë vetëm tre raste të vërtetuara. Kam pasur një pacient që ka dalë pozitiv dhe doli sërish pozitiv. Kjo pasi herën e parë nuk kishte krijuar antitrupa”, u shpreh doktori.
“Në këtë situatë e vetmja shpresë është vaksina”, tha Shefi i Laboratorit të Mikrobiologjisë.
