Shtetet e Bashkuara dhe Izraeli i kanë bërë një kërkesë të prerë Iranit: të dorëzojë uraniumin e pasuruar. Lajmi u bë i ditur nga ministri izraelit i Mbrojtjes, Israel Katz, gjatë një interviste për Channel 13, ku foli për sulmet e fundit të koordinuara ndaj objekteve bërthamore iraniane.
Sipas Katz, sulmet kishin për qëllim neutralizimin e infrastrukturës përreth, jo shkatërrimin e vetë materialit bërthamor. “Tani ekziston një qëndrim i përbashkët mes SHBA-së dhe Izraelit: Iranit i thuhet qartë se duhet ta dorëzojë këtë material,” deklaroi ai.
Katz theksoi gjithashtu se Irani aktualisht “nuk ka më aftësi për të prodhuar bombë bërthamore”, pasi është shkatërruar edhe impianti i konvertimit që e kthen uraniumin në gjendje të ngurtë, një hap kyç në procesin për ndërtimin e armëve bërthamore.
Ky zhvillim tregon një përshkallëzim të mëtejshëm të presionit ndërkombëtar ndaj Teheranit dhe vendosjen e vijave të kuqe të qarta në lidhje me ambiciet e tij bërthamore.
