Rihanna pushtoi mbrëmjen e modës në “New York Fashion Week” me një sfilatë drithëruese, ku prezantoi koleksionin me veshje të brendshme të “Savage x Fenty”.
Rihanna ishte kujdesur deri në detaje që të gjitha femrat e çdo lloj përmase të mund të preknin koleksionin, ndaj në pasarelë u shfaqën modele të dobëta si dhe ato të kolme.
Në koleksion mbizotëronin punimet në ngjyrë nude dhe plot dantellë, si dhe veshje të brëndshme të rehatshme kryesisht në ngjyra gri dhe të zeza.
Sfilata ishte ideuar në mënyrë perfekte, brenda pasarelës ishte ndërtuar një kafaz prej xhami, ndërsa përreth saj kërcimtarë të veshur me koleksionin, performonin koreografitë e tyre!
Sfilata u hap nga modelja Gigi Hadid e cila e veshur me të brëndshme dantellë ngjyrë nude, parakaloi përpara të pranishmëve, ndërsa e shoqëronin edhe tre kërcimtarë.
Një ndër momentet më emocionuese ishte kur modelja shtatzënë Slick Wooks u shfaq e veshur me të brendshme, ku theksohej barku i rrumbullakosur.
Por ajo nuk ishte modelja e vetme në pritje të ëmbël, pasi më pas u shfaq një tjetër e veshur me të brendshme nude.
Rihanna kishte si synim të përcillte mesazhin se çdo femër është seksi pavarësisht formave të saj të trupit.
Në fund të sfilatës, nën tingujt e këngës “Love me Tender” të Elvis Presley u shfaq edhe Rihanna e veshur me një fustan kafe, duke ecur dorë për dore me modelet në shenjë solidariteti.
Gjatë intervistave në prapaskenë, ajo pranoi se po punon edhe për produksione të reja muzikore, ndaj shumë shpejt do e shohim me një këngë të re.
