Sezoni turistik do të mbyllet më datën 15 nëntor.
Kështu u shpreh ministri i Turizmit Blendi Klosi, i cili tha se vendimi është marrë për të zëvendësuar kohën e humbur.
“Për të zëvendësuar kohën e humbur, ditët e marsit, prillit, majit me kërkesë dhe të operatorëve turistikë do të shtyjmë sezonin deri në 15 nëntor në mënyrë që dhe ju të keni mundësi të paguani faturat dhe taksat”, bëri të ditur Klosi.
Këtë vit plazhet nuk do të menaxhohen vetëm nga hotelet, por edhe nga restorantet e mëdha.
“Morëm një vendim te Këshillit te Ministrave para tre ditësh qe do bëjmë një ndryshim ne mënyrën e menaxhimit te plazheve ne vendin tone. Për çfarë e bëjmë e bëjmë se na duhet qe hotelet ne gjithë vijën bregdetare dhe ku s’ka hotele restorantet, qe ku s’ka , restorantet qe kane një numër te konsiderueshëm tavolinash. Pra restorante te vërtet jo nga ato kioskat qe ndërtohen, pra restorante mbi 20 tavolina. S’ka hotele do te menaxhojnë vijën bregdetare”, tha Klosi.
Zona e plazheve në qytetet bregdetare do të jetë e ndarë me kode unike, dhe të gjithë hotelet dhe restorantet do të kenë mundësinë që të aplikojnë nga 1 qershori në portalin e-albania për të marrë licencën, me të njëjtin çmim si në sezonet e kaluara.
“Në e-albania aplikimet nisin nga 1 qershori deri në 15 qershor, në mënyrë që më 1 korrik gjithçka të jetë gati. Aplikimi në e albania është shumë i thjeshtë, aplikohet dhe nga telefoni. Vendos numrin e NIPTIT, do të dëshmojë që posedon një hotel, vetë-deklarimin e kushteve të higjienës. Pra numri i banjove, dusheve. Këto janë 3 dokumente. Pastaj do të zgjedhë numrin e parcelës sipas kodit në hartën digjitale, për të cilën dëshiron të aplikojë si dhe një foto. Çmimet nuk kane ndryshuar janë ato qe këshilli bashkiak ka vendosur për hapësirën e Plazhit qe do te merret kurse kodet unike janë te menaxhuara nga një sistem i cili do te ofrohet online për strukturat hoteliere nga data 1 qershor”, u shpreh Klosi.
Ministri sqaroi gjithashtu se këtë vit nuk do të ketë kontrata 5-vjeçare, dhe të gjithë ata subjekte që nuk respektojnë protokollin shëndetësor, do të gjobiten dhe do t’u pezullohet licenca.
Sa u përket hapësirave publike, që sipas tij këtë vit janë të mirëpërcaktuara dhe do të ketë më shumë se vitet e tjera, duke iu dhënë mundësi qytetarëve që të përfitojnë nga vija bregdetare, u shpreh ministri.
Ndonëse plazhi nis nga nesër në hotele, shumë biznese i ka gjetur ky vendim me dyer të mbyllura pasi ende janë të paqartë mbi procedurat dhe rregullat për mënyrën se si do të funksionojnë, sipas ABC News.
“Ne i kemi gati po me rastin e koronavirusit ne nuk po dimë se çfarë rregulla të tjera do kemi, se nesër hapen kufijtë dhe mund të vijnë pushuesit”, thotë një prej pronarëve të hoteleve të pushimit.
Frika se nuk do ketë pushues, ka bërë që pronari i një hoteli në Shëngjin, të mos kthejë në punë stafin, dhe me vullnet të lirë do ta shtyjë hapjen.
“Na ka hyrë tmerri si biznes, dhe unë kam shtyrë afatin për datën 15 për pamundësi për ti paguar kot. Nëse Ministria e Turizmit na ndihmon i marr në punë, dhe nëse s’kam punë ju jep pagën e luftës, i marr që nesër”, thotë ai.
Moshapja e transportit publik është një tjetër pengesë.
“Punonjësit i kam nga fshatrat e Lezhës dhe me makinë private nuk ju del hesapi të vijnë. Po nuk u hap transporti, punonjësit nuk kanë me çfarë të vijnë. Edhe pushuesit e njëjta gjë. Vijnë me furgona nga Lezha në Shëngjin”, shprehet ai për ABC News.
