Jo më larg se dje, Ministri i Turizmit Blendi Klosi u shpreh se sezoni turistik do të shtyhet deri më datë 15 nëntor me qëllimin që bizneset të kenë mundësi të rikuperojnë të ardhurat që humbën nga ditët e karantinës në muajt prill dhe maj.
Por le ta analizojmë pak të gjithë këtë që ai ka thënë duke patur parasysh veten tone në situatën në të cilën gjendemi.
A kanë mundësi që njerëzit e thjeshtë të marrin pushime në muajin tetor dhe në muajin nëntor siç pretendon z.Klosi?
A kemi mjaftueshëm para dhe kursime për të pushuar ashtu siç e kishim parashikuar më herët se të goditeshim nga kjo pandemi?
Kanë qenë këto pak a shumë pikëpyetjet që kemi ngritur dhe kemi kontaktuar me kreun e Shoqatës së Turoperatorëve dhe Agjencive Turistike, z. Rexhep Kasmi për ta analizuar më tej këtë situatë.
Sapo e kontaktuam dhe ia rikujtuam e njëherë deklaratën e ministrit, ai filloi të qeshte me ironi dhe e përkufizoi në shumë “absurde” atë çfarë z.Klosi tha.
“Nuk është në dorën e ministrit që të caktojë kohën e pushimeve dhe të zgjasë sezonin turistik. Është absurde të bësh këtë deklaratë. Ai duhet të japë dorëheqjen. Duhet të ketë qenë tapë se një njeri normal nuk e thotë këtë”, u shpreh Rexhep Kasmi për “iconstyle.al”.
Ai vazhdoi duke shpjeguar se ata në fakt kanë punuar gjatë gjithë kohës për të zgjeruar sezonin turistik, por të paktën deri në shtator, jo deri në 15 nëntor siç pretendon ministri, pasi nuk është aspak në dorën e tij.
“Ne punojmë gjatë gjithë kohës që të zgjerojmë sezonin turistik sepse konsiderohej nga 15 korriku deri në fund të gushtit. Sezoni është zgjeruar në kohë, por jo se donte ministri. Sot janë krijuar kushtet që të mendohet një periudhë e përshtatshme për pushime, pra nga korriku deri në shtator. Por kush vjen në tetor dhe në nëntor që të bëjnë pushime? Nëse ai atëherë vendos që t’i dëmshpërblejë pushuesit dhe t’ju japë para që të pushojnë në atë periudhë, atëherë dakord”, shtoi Rexhep Kasmi.
Gjithashtu Ministri i Turizmit Blendi Klosi në deklaratën e tij sqaroi ndarjen ku 80% do të ketë plazhe private dhe 20% do t’ja lenë publikut.
Një deklaratë për të cilën mesa duket nuk është menduar mjaftueshëm, pasi nuk ka marrë parasysh të gjithë infrastrukturën.
Rexhep Kasmi për “iconstyle.al” tha se në fakt ky raport ka ekzistuar më herët dhe jo se u vendos pikërisht për këtë vit. Por sipas tij, plazhi publik është një gënjeshtër dhe nuk i shërben askujt.
Ai u shpreh se është 100% për plazh privat pasi bashkitë e vendit tonë nuk kanë infrastrukturën e duhur për të kaluar qytetarët pushimet.
“Plazhet publike nëse nuk trajtohen siç duhet, nuk pastrohen gjatë gjithë kohës, nuk vendosin tualete dhe dushe, atëherë ky nuk është një plazh publik, por është një xhungël. Nuk kemi strukturat për ta mirëmbajtur dhe për ta kontrolluar. Për mua s’ka bashkia infrastrukturën e duhur për të kaluar pushimet. Më mirë të jetë 100% privat se jemi të sigurt që privati i bën një pastrim plazhit, heq mbeturinat dhe ka një cilësi më të mirë ambjenti” përfundoi ai.
Sektori i turizmit është dëmtuar rëndë pasi 70% e turistëve i kanë anuluar prenotimet dhe pjesa tjetër është ende pezull. Sipërmarrëst e kësaj industrie po përballen me periudhën më të errët, pasi dëmet janë shumë të mëdha, sidomos nëse përmendim zonat përreth Adriatikut që u goditën edhe nga tërmeti i 26 nëntorit.
Pikërisht në momentin që po merrnin veten nga kjo fatkeqësi natyrore, iu duhet të përballen me një tmerr tjetër akoma më të madh siç është pandemia globale.
Turizmi shqiptar po përjeton padyshim periudhën më të vështirë çka bëhet edhe më e frikshme me mungesën e suportit nga ana e qeverisë. Pra, situata është kthyer e gjitha në kolaps, padashur t’ju frikësojmë.
