Këngëtarja Era Istrefi i ka bërë krenarë gjithë shqiptarët me lajmin se do të jetë pjesë e këngës zyrtare të Kampionatit Botëror përkrahë yjeve botërore si, Will Smith dhe Nicky Jam.
Mirëpo ndërkohë që tashmë kemi një arsye më shumë për ta ndjekur Kampionatin Botëror të futbollit, duket se për këngëtaren shqiptare kanë filluar pengesat e para.
Era Istrefi rrezikon që të humbasë performancën në hapjen e Botërorit, për shkak të vizës në Rusi. E gjitha kjo është për shkak të kufizimeve që ka pasaporta e Kosovës me ambasadën Ruse.
Për të shmangur probleme të tilla Era vitin e kaluar mori pasaportën shqiptare, por pavarësisht kësaj Rusia ia mbylli dyert dhe nuk ia dha vizën, duke mos i dhënë mundësinë për të qenë pjesë e një organizmi madhor muzikor ku merrnin pjesë emra të njohur të muzikës botërore.
Si pasojë e kësaj, Era nuk mundi dot që vitin e kaluar të performonte në skenë krahas artistëve të tjerë si Dua Lipa, Bebe Rexha, Arilena Ara etj.
I njëjti shqetësim duket se ka nisur edhe këtë vit për Erën.
“Tani duhet të merremi me vizën e Rusisë. Erës i duhet të kthehet në Shqipëri dhe në Kosovë për t’u marrë me to” , mësohet të ketë thënë e ëma e Erës, Suzana Tahirsylaj, për emisionin “Jo vetëm modë”.
Shpresojmë që këtë vit të mos përsëritet historia dhe Era të jetë pjesë e performancës hapëse të Kampionatit Botëror.
