Intervista e një gruaje që ka qenë viktimë e sulmeve seksuale gjatë luftës së Kosovës, bëri bujë dy ditë më parë, pasi ishte rrëfimi i parë që bëhej publik në media.
Vasfije Krasniqi-Goodman, e cila sot jeton në Teksas të Shteteve të Bashkuara, theu tabunë mbrëmjen e së martës duke rrëfyer publikisht tmerrin e përjetuar kur është përdhunuar dy herë nga forcat policore serbe në vitin 1999.
Ndërkohë, sot mediat shkruajnë se në vitin 2014, një zyrtar i Policisë së Kosovës nga komuniteti serb ishte akuzuar nga Prokuroria e EULEX-it, nën dyshimin se kishte dhunuar qytetaren Vasfije Krasniqi-Goodman, të njohur si Buqja në prill të vitit 1999.
Në një proces gjyqësor që kishte zgjatur pothuajse një vit, zyrtari policor i Kosovës, Jovica D., që kishte shërbyer në Policinë e Kosovës nga viti 2001 deri më 2017, ishte liruar nga akuzat me vendim të Gjykatës Supreme të Kosovës.
Sipas një raporti të Fondit për të Drejtën Humanitare (FDH), përveç ish-policit të Kosovës dhe një person tjetër, ishin gjykuar nga tri shkallë të Gjykatave lidhur me akuzat për përdhunimin e Vasfije Krasniqit gjatë kohës së luftës së Kosovës, kur ajo kishte qenë vetëm 16 vjeçe.
Pasi Gjykata Themelore e Prishtinës i liroi nga akuzat shtetasit Jovica D. dhe Gjorgje B.në vitin 2014, disa muaj më vonë Gjykata e Apelit i shpalli fajtorë dy të dyshuarit. Mirëpo, Jovica D. dhe Gjorgje B. ishin shpallur të pafajshëm nga Gjykata Supreme e Kosovës, dhe rasti u quajt i mbyllur.
Siç shkruajnë mediat kosovare, Jovica Dejanoviq, ish-paramilitar serb, kishte shërbyer në Policinë e Kosovës për 16 vjet. Lajmin e ka konfirmuar për “Insajderin”, zyra për Informim e Policisë së Kosovës.
/Agjensia e Lajmeve Sot News
